గుంటూరులో జరగనున్న ప్రధాని నరేంద్ర మోడీ సభను అడ్డుకుని తీరుతామని వామపక్షాలు నిరసన చేపట్టాయి. ఏపీకి ప్రత్యేక హోదా ఇస్తామంటూ హామీ ఇచ్చి మోసం చేసిన ప్రధాని మోడీ ఏ ముఖం పెట్టుకుని రాష్ట్రంలో సభలు నిర్వహిస్తారని వామపక్షాలు ప్రశ్నించాయి. మోడీ పర్యటనను రాష్ట్రంలో అడ్డుకుంటామని ప్రకటించాయి.
గుంటూరులో రేపు జరగనున్న మోడీ సభను అడ్డుకుంటామని వామపక్షాలు నిరసన చేపట్టాయి. ప్రకాశం జిల్లా చీరాలలో ఖాళీ కుండలతో నిరసన తెలియజేసి అనంతరం వాటిని పగులగొట్టాయి. మోడీ గో బ్యాక్‌ అంటూ నినాదాలు చేశారు. ఈ కార్యక్రమానికి సీపీఎం, సీపీఐ రాష్ట్ర నేతలు మధు, రామకృష్ణలు హాజరయ్యారు. రాష్ట్రవ్యాప్తంగా తమ నిరసనను తెలియజేస్తామని, అరెస్టులకు కూడా భయపడమని స్పష్టం చేశారు. ఆయా పార్టీలు, ప్రజా సంఘాలు కూడా మోడీ పర్యటనను అడ్డుకోవాలని పిలుపునిచ్చారు.
