భారత పైలెట్ అభినందన్‌ను విడుదల చేస్తున్నామంటూ పాకిస్థాన్ ప్రధాని ఇమ్రాన్ ఖాన్ ప్రకటించారు. భారత వాయుసేన పైలట్ అయిన అభినందన్ వర్ధమాన్.. శుక్రవారం సాయంత్రం లోపు భారత్ చేరుకునే వీలుంది. ఈ నేపథ్యంలో.. ఓ సైనికుడు యుద్ధఖైదీగా పట్టుబడినప్పుడు అతని మానసిక స్థితి ఎలా ఉంటుందో తనకు అనుభవమేనని కార్గిల్ హీరో నచికేత అన్నారు.
కాగా, నచికేత 1999 కార్గిల్ వార్ సమయంలో భారత వాయుసేన పైలెట్. అభినందన్ తరహాలోనే నచికేత కూడా పాక్ సైన్యానికి బందీగా పట్టుబడ్డాడు. అయితే భారత్ దౌత్యమార్గాల్లో పాకిస్థాన్‌పై ఒత్తిడి తెచ్చి నచికేతను సురక్షితంగా వెనక్కి తీసుకువచ్చారు. ఈ సందర్భంగా నచికేత తన అనుభవాన్ని ఈ సందర్భంగా పంచుకున్నారు.
ఎంతటి హింసనైనా భరిస్తారు కానీ, యుద్ధఖైదీలుగా పట్టుబడిన రక్షణ రంగ సిబ్బంది దేశ రహస్యాలను మాత్రం బయటికి చెప్పకూడదన్న పట్టుదలతో ఉంటారని వెల్లడించారు. ఇప్పుడు అభినందన్ కూడా అదే దృఢనిశ్చయంతో కనిపిస్తున్నాడని నచికేత తెలిపారు.
అభినందన్‌ను వీడియోలో చూసిన తర్వాత ఒక సాహసోపేత పైలెట్ అనిపించిందని, వృత్తి పట్ల ఎనలేని అంకితభావం ఉన్న వ్యక్తిగా భావిస్తున్నట్టు నచికేతన వెల్లడించారు.
అయితే, అభినందన్‌కు సంబంధించిన వీడియోల విషయంలో మీడియా సంయమనం పాటించాల్సిందని నచికేత అభిప్రాయపడ్డారు. అభినందన్‌ను పాక్ సైనికులు హింసిస్తున్న వీడియోలు పదేపదే ప్రసారం చేయడంతో అతని కుటుంబ సభ్యులు తీవ్రంగా బాధపడి ఉంటారని అన్నారు. అయితే అభినందన్ మాత్రం తనపై పాకిస్థాన్ ప్రజలు దాడి చేశారని.. పాక్ ఆర్మీ రక్షించిందని చెప్పారని గుర్తు చేశారు.
