తానెప్పుడూ జాతీయ గీతాన్ని వ్యతిరేకించలేదు.. బిర్యానీ, హలీం అంటే ఇష్టమని హైదరాబాద్ ఎంపీ, ఎంఐఎం అధినేత అసదుద్దీన్ ఒవైసీ వెల్లడించారు. ‘ఆస్క్ అసద్’ పేరుతో గురువారం ట్విట్టర్ వేదికగా నెటిజన్లు అడిగిన ప్రశ్నలకు ఆసక్తికర సమాధానాలు చెప్పారు. తాము అందరి కోసం పోరాడుతున్నామన్న అసద్.. అందరికీ న్యాయం జరగాలన్న లక్ష్యంతో భారతీయుడిగా లోక్‌సభలో తన వాణిని వినిపిస్తున్నట్టు చెప్పారు.
హిందూత్వమంటే తనకు గౌరవమని పేర్కొన్నారు. తానెప్పుడు, ఏ పరిస్థితుల్లో ఉన్నా ‘జై హింద్’ అనే అంటానని, తానెప్పుడూ జాతీయ గీతాన్ని వ్యతిరేకించలేదని అన్నారు. అయితే, దానిని బలవంతంగా ఆలపించాలన్న దానినే తాను వ్యతిరేకిస్తున్నట్టు చెప్పుకొచ్చారు.
జమ్ముకశ్మీర్‌లోని ప్రస్తుత పరిస్థితులపై నెటిజన్లు అడిగిన మరో ప్రశ్నకు అసద్ సమాధానం ఇస్తూ హింసను అరికట్టడం, రాంబో విధానాలను తగ్గించడం ద్వారా మాత్రమే అక్కడి పరిస్థితులను మెరుగుపర్చవచ్చన్నారు.
