సీబీఐ మాజీ జేడీ లక్ష్మీనారాయణ రాయలసీమ నుంచి పోటీచేస్తే బాగుంటుందని తన మనసులోని మాటను పవర్ స్టార్ పవన్ కల్యాణ్ బయటపెట్టారు. జనసేనలో జేడీ చేరటం చాలా సంతోషంగా వుందని.. పవన్ చెప్పారు.
తమకు వామపక్షాలతో పాటు బహుజన్ సమాజ్ పార్టీ(బీఎస్పీ)తో పొత్తు ఉన్న విషయాన్ని ఈ సందర్భంగా పవన్ కల్యాణ్ గుర్తుచేశారు. ఈ నేపథ్యంలో బీఎస్పీ, వామపక్షాల నేతలతో తాను చర్చలు జరపనున్నట్లు తెలిపారు. వారితో చర్చించాకే జేడీ సీటుపై స్పష్టమైన ప్రకటన చేస్తామని వెల్లడించారు.
సీబీఐలో జాయింట్ డైరెక్టర్‌గా పనిచేసిన కాలంలో ఎన్నో కీలక కేసుల్లో దర్యాప్తు చేసిన తెలుగుతేజం లక్ష్మీనారాయణ ఆదివారం జనసేన పార్టీ తీర్థం పుచ్చుకున్న సంగతి తెలిసిందే. ఆయన రాజకీయ రంగప్రవేశం గురించి కొన్నాళ్లుగా మీడియాలో ఊహాగానాలు వస్తున్నాయి.
టీడీపీలో చేరతారంటూ విపరీతంగా ప్రచారం జరిగింది. అయితే, అందరినీ ఆశ్చర్యానికి గురిచేస్తూ పవన్ కల్యాణ్ ఆహ్వానం మేరకు జనసేన పార్టీలో చేరారు. ఆదివారం పవన్ సమక్షంలో పార్టీ కండువా కప్పుకున్నారు.
