తన తండ్రి నాగబాబు నరసాపురం ఎంపీగా ప్రజారాజ్యం పార్టీ తరపున పోటీ చేయడంపై మెగా డాటర్, టాలీవుడ్ హీరోయిన్ నిహారిక స్పందించారు. ‘మా నాన్న జనసేనలో చేరినందుకు, అలాగే నరసాపురం నుంచి పోటీ చేస్తున్నందుకు సంతోషంగా ఉంది. మా కల్యాణ్ బాబాయ్ నాయకత్వంలోని జనసేన పార్టీనే.. ఉన్న పార్టీలన్నింటిలోకి ఖచ్చితమైన నీతి, విలువలు ఉన్న పార్టీ. బాబాయ్, నాన్న, పార్టీ.. ఎన్నికలలో అఖండ విజయం సాధించాలని హృదయపూర్వకంగా కోరుకుంటున్నాను..’ అని నిహారిక అన్నారు.
కాగా, జనసేన పార్టీ అధ్యక్షుడు పవన్ కల్యాణ్ సమక్షంలో మెగాస్టార్ చిరంజీవి తమ్ముడు నాగబాబు బుధవారం పార్టీలో చేరిన విషయం తెలిసిందే. ఇటీవల కొంతకాలం నుంచి యూట్యూబ్ చానెల్ ద్వారా జనసేనకు మద్దతుగా నాగబాబు పనిచేస్తున్నారు. తాను పార్టీలో లేకపోయినా తన తమ్ముడి గెలుపుకోసం కృషి చేస్తానని చెబుతూ వచ్చారు.
ఈ నేపథ్యంలో పశ్చిమగోదావరి జిల్లా నరసాపురం లోక్‌సభ అభ్యర్థిగా నాగబాబు పోటీ చేయబోతున్నారు. అయితే తన తండ్రి పోటీ విషయంపై తనయుడు వరుణ్ తేజ్ సంతోషం వ్యక్తం చేసిన విషయం తెలిసిందే. ఇప్పుడు తనయ నిహారిక కూడా తన ట్విట్టర్ ద్వారా నాగబాబు పోటీపై ఆనందాన్ని వ్యక్తం చేసింది.
