నేచురల్ స్టార్ నాని. శ్రద్ధ శ్రీనాథ్ జంటగా నటిస్తున్న చిత్రం ‘జెర్సీ’. ‘మళ్లీరావా’ ఫేమ్ గౌతమ్ తిన్ననూరి దర్శకత్వంలో క్రికెట్ నేపథ్యంలో రూపుదిద్దుకుంటున్న చిత్రం. ఈ చిత్రానికి యువ దర్శకుడు అనిరుధ్ సంగీతం అందిస్తున్నారు. ‘అజ్ఞాతవాసి’ తర్వాత ఆయన సంగీతబాణీలు సమకూర్చుతున్న చిత్రం.
సితార ఎంటర్‌టైన్‌మెంట్స్ బ్యానర్‌పై నాగవంశీ ఎస్ నిర్మిస్తున్న ఈ చిత్రం ఏప్రిల్ 19వ తేదీన ప్రేక్షకుల ముందుకురానుంది. అయితే, హోలీ సందర్భంగా ఈ సినిమాలోని ‘అదేంటో గాని ఉన్నపాటుగా’ వీడియో సాంగ్ ప్రోమోను విడుదల చేశారు. ఇప్పటికే పూర్తి ఆడియో విడుదలైన ఈ సాంగ్‌ను చాలా చక్కగా చిత్రీకరించారని తాజాగా విడుదలైన వీడియో చూస్తుంటే తెలుస్తోంది.
క్రికెటర్‌ అర్జున్‌గా బ్యాట్ పట్టి గ్రౌండ్‌లో సిక్స్‌లు బాదడమే కాదు.. అంతకు మించిన రొమాంటిక్ ప్లేయర్‌ను అంటూ నాని ఈ సాంగ్లో ముద్దులతో మెస్మరైజ్ చేశాడు. ఈ సాంగ్లో ప్రాక్టీస్ చేస్తున్న నాని.. హీరోయిన్ దిగులుగా కూర్చుని
ఉండటం చూసి.. దగ్గరకు వెళ్లి.. ‘వెళ్లి స్నానం చేసి వస్తాను…పెళ్లి చేసుకుందాం..’ అని చెప్పే డైలాగ్ ఆకట్టుకుంటోంది. ఇదే డైలాగ్‌ను నాని తన ట్విట్టర్‌లో కూడా తెలపడం విశేషం. మరో విశేషం ఏమిటంటే ఈ పాటను స్వయంగా సంగీత దర్శకుడు అనిరుధ్ పాడటం విశేషం.
