నవమోసాలు మోసి కనిపెంచిన కన్నతల్లిని తిండి పెట్టకుండా ఓ కిరాతక కుమారుడు చంపేశాడు. అంతటితో ఆగకుండా.. తల్లి చనిపోతే.. మానవత్వాన్ని మరిచిపోయిన ఆ మృగం మాత్రం కన్నతల్లి శవాన్ని చెత్తకుప్పలో పడేశాడు. ఇంట్లో వుంటే కంపు కొడుతుందని శవాన్ని అలా చెత్తకుప్పలో పడేశాడు. ఈ సంఘటన అమెరికాలోని టెక్సాస్ ఏరియాలో వెలుగుచూసింది.
42 ఏళ్ల జెరెమీ డేవిడ్ అనే వ్యక్తి టెక్సాస్‌లో తల్లితో కలిసి నివాసం వుంటున్నాడు. తాగుడు బానిసైన డేవిడ్… రోజూ రాత్రి తాగి వచ్చి, 64 ఏళ్ల తల్లితో గొడవపడేవాడు. అలా ఆ రోజు బెడ్ రూమ్‌లోకి వెళ్లి తల్లిని తిట్టడం మొదలెట్టాడు. అయితే ఎంత తిట్టినా కదలిక లేదని అనుమానం వచ్చి, కదిపి చూడగా తల్లి ప్రాణాలు విడిచిన విషయం తెలిసింది.
విషయాన్ని వెంటనే అమ్మమ్మకు ఫోన్‌చేసి చెప్పిన డేవిడ్… తల్లి శవాన్ని ఓ పెద్ద ప్లాస్టిక్ కవర్‌లో చుట్టి, ఇంటి పక్కనే ఉన్న చెత్తకుప్పలో పడేశాడు. కన్నకూతురు చనిపోయిన విషయం తెలుసుకుని, ఆమెను కడసారి చూసుకుందామని ఆశగా ఇంటికొచ్చిన అతని అమ్మమ్మ… అక్కడ మృతదేహం లేకపోవడంతో షాక్‌కు గురైంది. ఏం చేశావని డేవిడ్‌ను నిలదీయగా… ఇంట్లో కంపుకొడుతుందని శవాన్ని చెత్తకుప్పలో పడేశానని అసలు విషయం సాఫీగా చెప్పాడు.
తన కూతురు మృతదేహాన్ని, మనవడు తీవ్రంగా అవమానించాడంటూ ఆమె పోలీసులకు ఫిర్యాదు చేసింది. కేసు నమోదు చేసుకున్న పోలీసులు… తల్లి శవాన్ని చెత్తకుప్పలో పడేసిన డేవిడ్‌ను అరెస్ట్ చేశారు. మృతదేహాలకు ఇవ్వాల్సిన కనీస మర్యాద కూడా తల్లి శవానికి ఇవ్వని అతనికి, అమెరికన్ చట్టాల ప్రకారం రెండేళ్ల జైలుశిక్ష పడే అవకాశం ఉంది.
