బాలీవుడ్ సూపర్ స్టార్ అమితాబ్ బచ్చన్. ఈయన ఓ తమిళ చిత్రంలో నటించనున్నారు. హిందీలో వరుస సినిమాలు చేస్తూనే, తెలుగులోనూ మెగాస్టార్ చిరంజీవి నటిస్తున్న “సైరా నరసింహా రెడ్డి” చిత్రంలో అత్యంత కీలకమైన పాత్రలో నటిస్తున్నారు.
ఇకపోతే, తమిళంలో తొలిసారిగా తనే ప్రధానమైన పాత్రగా ఒక సినిమా చేయడానికిగాను సై అన్నారు. ‘ఉయరంద మణిదన్’ (ఉన్నతమైన వ్యక్తి) పేరుతో రూపొందుతున్న ఈ సినిమాకి తమిళవాణన్ దర్శకుడు.
ప్రస్తుతం కొన్ని కీలకమైన సన్నివేశాలను చిత్రీకరిస్తున్నారు. ఈ చిత్రంలో అమితాబ్‌కు జోడీగా టాలీవుడ్ క్రేజీ సీనియర్ హీరోయిన్ రమ్యకృష్ణను ఎంపిక చేశారు. కథాపరంగా ఈ పాత్రకి ఎంతో ప్రాధాన్యత వుంటుందట.
అందువల్లనే రమ్యకృష్ణను ఎంపిక చేసినట్టుగా తెలుస్తోంది. అలాగే, తమిళ సినీ దర్శకుడు, నటుడు ఎస్.జె. సూర్య ఒక ముఖ్యమైన పాత్రను పోషిస్తున్నాడు. తమిళంతో పాటు హిందీలోనూ విడుదల చేసే ఆలోచనలో ఉన్నారట.
