తెలంగాణ సీఎం కేసీఆర్‌పై రాములమ్మ తీవ్రస్థాయిలో విమర్శలు గుప్పించారు. 16 సీట్లు గెలిచి కేసీఆర్ చక్రం తిప్పితే 22 సీట్లు గెలుస్తానంటున్న జగన్ ఏం తిప్పాలి? అంటూ ప్రశ్నించారు. ఎక్కువ సీట్లు గెలిచిన పార్టీలను కేసీఆర్ ఎలా శాసిస్తారు? అంటూ నిలదీశారు. అలాగే కేసీఆర్ సారూ.. ప్రధాని కారంటూ ఎద్దేవా చేశారు.
కేసీఆర్ 16 సీట్లకే ఎగిరెగిరి పడుతుంటే 22 లోక్‌సభ స్థానాలు గెలుస్తానంటున్న జగన్ పరిస్థితి ఏంటని టీపీసీసీ ప్రచార కమిటీ చైర్మన్‌ విజయశాంతి అడిగారు. టీఆర్ఎస్ లోక్‌సభ ఎన్నికల ప్రచార నినాదమైన ‘సారు, కారు, సర్కారు’ను విజయశాంతి ప్రస్తావిస్తూ.. ‘కేసీఆర్ సారు.. ప్రధాని ‘కారు’’ అని ఎద్దేవా చేశారు.
తక్కువ సీట్లు గెలిచిన పార్టీ ఎక్కువ సీట్లు గెలిచిన పార్టీలను ఎలా శాసిస్తుందని విజయశాంతి ప్రశ్నించారు. కేసీఆర్ చక్రం తిప్పేదాకా జగన్ ఊరుకుంటారా? అని నిలదీశారు. కేసీఆర్ ఎన్నికల ప్రచారం ప్రశ్నలకు దొరకని సమాధానమేనని విమర్శించారు. కాంగ్రెస్ చీఫ్ రాహుల్ గాంధీ ‘న్యాయ్’ పథకాన్ని ప్రకటించి హీరో అయ్యారని, నోట్ల రద్దు, జీఎస్టీతో ప్రధాని మోదీ జీరో అయ్యారని విజయశాంతి పేర్కొన్నారు.
