తాత్కాలిక లబ్ది పొందేందుకు తెరాస అధినేత కేసీఆర్ వేసే బిస్కెట్లకు వైకాపా అధినేత జగన్ మోహన్ రెడ్డిలా వెంపర్లాడబోనని జనసేన అధినేత పవన్‌కల్యాణ్‌ స్పష్టం చేశారు. భీమవరం, పాలకొల్లు, నరసాపురంలో ప్రచారం నిర్వహించిన పవన్ ప్రసంగింస్తూ, ‘కేసీఆర్ వేసే బిస్కట్లకు జగన్‌లా కక్కుర్తి పడను. టీడీపీ కరుడుకట్టిన పార్టీ. వైసీపీ క్రిమినల్స్‌తో ప్రజలపై జులుం చేసే కిరాతక పార్టీ. ఇలాంటి ఇద్దరు కంసులతో ఐదేళ్ల బిడ్డ జనసేన ఒంటరిగా పోరాడుతోంది అన్నారు.
‘కేసీఆర్ హోదాకి ఓకేనంటున్నారు. ఇంతకాలం ఏమయ్యారు? ఇప్పుడే ఎందుకు మాట్లాడుతున్నారు? అందుకే కాబోలు జగన్‌కు సడన్‌గా కేసీఆర్ అంటే ప్రేమ వచ్చింది! శ్రీవారి ఆలయంలోకి జగన్ చెప్పులు వేసుకుని వెళ్లాడు. అలాంటి సంస్కారం లేని వ్యక్తి సీఎం అయితే భగవంతునికి, తల్లికి, ప్రజలకు ఏం గౌరవం!’ అని పవన్ నిలదీశారు.
‘నాకు నా పిల్లలు ఎంతో జనసేన పార్టీ, ఆంధ్ర ప్రజలు అంతే!’ అని స్పష్టం చేశారు. గాజు గ్లాసుకు ఓటు వేసి జనసేన అధికారం చేపట్టేలా సహకరించాలని ప్రజలను కోరారు. 2014 లో ఏం జరిగిందో గుర్తుందా? అని కేసీఆర్‌ను పవన్ ప్రశ్నించారు. జగన్ పవిత్రమైన శ్రీవారి దేవస్థానంలోకి చెప్పులతో వెళ్లాడని, ఇలాంటి వ్యక్తి సీఎం కాలేడన్నారు. యాదాద్రి ఆలయంలోకి జగన్ చెప్పులతో ప్రవేశిస్తే అంగీకరిస్తారా? అని కేసీఆర్‌ను ప్రశ్నించారు.
‘తెలంగాణ ఉద్యమంలో నిజాయితీ ఉంది. అందుకే కేసీఆర్‌కు ప్రజలు సీఎంగా పట్టం కట్టారు. కానీ, జగన్‌కు కేసీఆర్ వెన్నుదన్నుగా నిలవడం సరికాదు. ఆంధ్ర ప్రజలను అనేకమార్లు కించపరచిన కేసీఆర్‌ను అడ్డం పెట్టుకుని జగన్ ఓట్లు సంపాదించగలరా?’ అని నిలదీశారు. 2014లోనూ జగన్ సీఎం అవుతున్నారని కేసీఆర్ ప్రకటించారని, అప్పుడు ఎవరు గెలిచారో కేసీఆర్ గుర్తు చేసుకోవాలని హితవుపలికారు. 2019 ఎన్నికల్లో జనసేన అధికారంలోకి వస్తుందని పవన్ జోస్యం చెప్పారు.
