దక్షిణాది చిత్ర పరిశ్రమలో ప్రతిభావంతురాలైన నటిగా పేరు తెచ్చుకున్న హీరోయిన్లలో సమంత ఒకరు. ఈనెల 11వ తేదీన ఆంధ్రప్రదేశ్ రాష్ట్ర శాసనసభకు జరుగనున్న ఈ ఎన్నికల్లో రేపల్లె సిట్టింగ్ ఎమ్మెల్యే అనగాని సత్యప్రసాద్‌కు మద్దతిస్తోంది. ఈ మేరకు ఓ వీడియోలో అభిమానులకు విజ్ఞప్తి చేసింది. సైకిల్ గుర్తుపై ఓటేసి రేపల్లె టీడీపీ అభ్యర్థి అనగానిని గెలిపించాలని సూచించింది.
అయితే, అనగానికి మీకు ఏంటి సంబంధం అని ఓ నెటిజన్ ప్రశ్నించగా, ఆయన తమ ఫ్యామిలీ ఫ్రెండ్ అని సమంత బదులిచ్చింది. అనగాని సోదరి డాక్టర్ మంజుల తమ ప్రత్యూష ఫౌండేషన్ కార్యక్రమాల్లో కీలకపాత్ర పోషిస్తున్నారని, తాను హైదరాబాద్ వచ్చినప్పటి నుంచి అనగాని ఫ్యామిలీతో పరిచయం ఉందని తెలిపింది.
సత్యప్రసాద్ మంచివాడు కాబట్టే తాను మద్దతు ఇస్తున్నానని సమంత వెల్లడించింది. ఈ విషయంలో రాజకీయాలకు తావులేదన్నారు. కేవలం కుటుంబ స్నేహితుడు, మంచి వ్యక్తి కావడం వల్లే తాను ఆయనకు మద్దతిచ్చి.. గెలిపించాలని ఓటర్లకు విజ్ఞప్తి చేస్తున్నట్టు వివరణ ఇచ్చింది.
