ప్రముఖ సినీ నటి, కాంగ్రెస్ నేత ఖుష్బు ఎన్నికల ప్రచారంలో ఉండగా ఓ వ్యక్తి ఆమె పట్ల అసభ్యంగా ప్రవర్తించి చెంప ఛెళ్లుమనిపించుకున్నాడు. దీనికి సంబంధించిన వీడియో ఒకటి సోషల్ మీడియాలో వైరల్ అయింది. ఈ నేపథ్యంలో ఓ నెటిజన్ దీనిని చిన్మయికి షేర్ చేస్తూ ట్వీట్ చేశారు.
‘ఈ మాటలు కేవలం చిన్మయి కోసం మాత్రమే.. మహిళలతో తప్పుగా ప్రవర్తించిన వ్యక్తికి ఖుష్బూ మేడం సరిగ్గా బుద్ధి చెప్పారు’ అని ఆ నెటిజన్ కామెంట్ పెట్టాడు. ఈ ట్వీట్‌ని చూసిన చిన్మయి వెంటనే రిప్లై ఇచ్చారు.
‘ఖచ్చితంగా.. ఈ సారి నాకు వైరముత్తు కనిపిస్తే తప్పకుండా చెంప పగులగొట్టాలన్న విషయం గుర్తు పెట్టుకుంటా. చూస్తుంటే.. నాకు కేవలం ఈ విధంగా మాత్రమే న్యాయం జరిగేలా ఉంది’ అంటూ ట్వీట్ చేసింది.
ప్రముఖ తమిళ సినీ రచయిత వైరముత్తు తనను పదేళ్ల క్రితం లైంగికంగా వేధించారని ఆమధ్య ‘మీటూ’ ఉద్యమంలో భాగంగా ప్రముఖ గాయని చిన్మయి ఆరోపించిన సంగతి, ఇది పెద్ద వివాదం అయిన విషయం విదితమే.
