ప్రస్తుతం జరుగుతున్న 17వ సార్వత్రిక ఎన్నికల్లో భారతీయ జనతా పార్టీకి 150 నుంచి 170కి మించి సీట్లు రావని ఏపీ ముఖ్యమంత్రి, టీడీపీ అధినేత నారా చంద్రబాబు నాయుడు జోస్యం చెప్పారు.
కర్ణాటకలోని శ్రీరామనగర, సింధనూరు ఎన్నికల బహిరంగ సభల్లో మాట్లాడిన చంద్రబాబు ప్రధాని మోడీపై మరోమారు విరుచుకుపడ్డారు. మహాత్ముడు జన్మించిన ప్రాంతంలో పుట్టిన మోడీ పచ్చి అబద్ధాలకోరుగా మారిపోయారన్నారు.
ఇలాంటి ప్రధాని ఉంటే దేశానికి ప్రమాదమని, దించేద్దామని ఓటర్లకు పిలుపునిచ్చారు. ప్రవాసాంధ్రులు, కన్నడిగులు ఇందుకు సహకరించాలని పిలుపునిచ్చారు. తిరుపతి వేంకటేశ్వరుడి సాక్షిగా ఏపీకి ప్రత్యేక హోదా ఇస్తామన్న మోడీ.. దారుణంగా మోసం చేశారన్నారు.
ఆంధ్రుల ఆత్మగౌరవం కోసమే ఎన్‌డీఏ నుంచి బయటకు వచ్చి తిరుగుబాటు చేసినట్టు చెప్పారు. 126 మంది ఎంపీలు మద్దతు ఇచ్చిన కరుడుగట్టిన మోడీ మనసు మారలేదన్నారు. కర్ణాటకలో బీజేపీ ప్రభుత్వం లేకపోయిన ఎన్నికల్లో వేల కోట్ల రూపాయలు ఖర్చు చేస్తోందని, ఆ సొమ్మంతా ఎక్కడి నుంచి తెచ్చిందని చంద్రబాబు ప్రశ్నించారు.
