తెలంగాణ రాష్ట్రంలో ఇంటర్ బోర్డు అధికారుల నిర్లక్ష్యం కారణంగా లక్షలాది మంది విద్యార్థులు ఫెయిల్ అయ్యారు. ముఖ్యంగా, జవాబు పత్రాల మూల్యాంకనలో లెక్చరర్లు వేసిన మార్కుల మంటలు ఇంకా చల్లారలేదు.
ఈ నేపథ్యంలో ఇంటర్ విద్యార్థిని నవ్యకు సున్నా మార్కులు వేసిన తెలుగు లెక్చరర్‌పై కఠిన చర్యలు తీసుకున్నారు. ఆమెను విధుల నుంచి తొలగిస్తూ శ్రీనారాయణ జూనియర్ కాలేజి నిర్ణయం తీసుకుంది. అంతేగాకుండా, ఇంటర్ బోర్డు ఆ అధ్యాపకురాలికి రూ.5000 జరిమానా విధించింది. ఆ జరిమానాను సదరు లెక్చరర్ వెంటనే చెల్లించారు.
జవాబు పత్రాల మూల్యాంకనం స్క్రూటినైజర్ విజయ్ కుమార్‌పైనా సస్పెన్షన్ వేటుపడింది. నవ్యకు తెలుగు సబ్జెక్టులో 99 మార్కులకు బదులు సున్నా మార్కులు రావడం ఇంటర్ ఫలితాల అవకతవకలకు పరాకాష్టగా చెప్పుకోవచ్చు. పైగా, ఈ పరీక్షల్లో ఫెయిల్ కావడాన్ని జీర్ణించుకోలేని విద్యార్థులు దాదాపు 20 మంది వరకు ప్రాణాలు కోల్పోయారు.
