ప్రధానమంత్రి నరేంద్ర మోడీని దుర్యోధనుడుతో ఏఐసీసీ ప్రధాన కార్యదర్శి ప్రియాంకా గాంధీ పోల్చారు. మహాభారతంలోని దుర్యోధనుడికి కూడా ప్రధాని నరేంద్ర మోడీకి ఉన్న దురహంకారమే ఉండేదన్నారు. దురహంకారమే దుర్యోధనుడి పతనానికి కారణమైందని ఆమె గుర్తుచేశారు. మన దేశం ఎప్పుడూ దురహంకారాన్ని క్షమించదని హెచ్చరించారు.
తన తండ్రి, మాజీ ప్రధాని రాజీవ్‌ గాంధీని నంబర్‌ వన్‌ అవినీతిపరుడని మోడీ విమర్శించడంపై ఆమె విరుచుకుపడ్డారు. హర్యానాలో జరిగిన బహిరంగ సభలో ప్రియాంకా గాంధీ నిప్పులు చెరిగారు. ‘వాళ్లకు ఏ అంశం దొరకనప్పుడు మా కుటుంబాన్ని కించపరుస్తుంటారు. ఈ దేశం ఎప్పుడూ దురహంకారాన్ని క్షమించలేదు. దీనికి చరిత్రే సాక్ష్యం. మహాభారతం కూడా సాక్ష్యమే. ఇదే దురహంకారం దుర్యోధనుడికి కూడా ఉండేది. శ్రీకృష్ణుడు అతని వద్దకు వెళ్లి నిజమేమిటో చెబితే… శ్రీకృష్ణుడినే బంధించేందుకు ప్రయత్నించాడు’ అని ప్రియాంక చెప్పారు.
శ్రీకృష్ణుడి హెచ్చరికలను ప్రస్తావిస్తూ రాసిన ఒక పద్యం పంక్తులను ఆమె చదివి వినిపించారు. మరోవైపు ఢిల్లీ యూనివర్సిటీ ఉపాధ్యాయులు కూడా మోడీ వ్యాఖ్యలను ఒక ప్రకటనలో ఖండించారు. దేశ సేవలో ప్రాణత్యాగం చేసిన రాజీవ్‌ గాంధీపై అవమానకర వ్యాఖ్యలతో మోడీ ప్రధాని పదవి గౌరవాన్ని దిగజార్చారని వారు విమర్శించారు.
