గత ఎన్నికల్లో ఇచ్చిన హామీల్లో ఒక్కటైనా ప్రధానమంత్రి నరేంద్ర మోడీ నెరవేర్చారా? అంటూ కాంగ్రెస్ పార్టీ నేత శ్యామ్ పిట్రోడా సూటిగా ప్రశ్నించారు. మోడీది గుజరాత్ అని.. తనది కూడా గుజరాత్ రాష్ట్రమేనని, ఆయనకు దమ్మంటే ఎన్నికల హామీల చర్చకు రావాలని పిలుపునిచ్చారు.
ఇదే అంశంపై ఆయన మాట్లాడుతూ, ఇచ్చిన హామీలు నెరవేర్చకపోవడంపై దమ్ముంటే తమతో చర్చకు రావాలంటూ మోడీకి పిట్రోడా సవాల్ విసిరారు. 2014 ఎన్నికల సందర్భంగా బీజేపీ ఎన్నో హామీలు ఇచ్చినా, వాటిని నెరవేర్చడంలో విఫలమైందని ఆరోపించారు. ఈ విషయంలో కాంగ్రెస్ అధినేత రాహుల్ గాంధీతో చర్చకు రావాలని, లేదంటే తనతోనైనా చర్చకు రావాలని, తాను కూడా ఓ గుజరాతీనే అంటూ చాలెంజ్ చేశారు.
మోడీ స్వీయ ప్రచారం కోసం ప్రజాధనాన్ని దుర్వినియోగం చేశారంటూ పిట్రోడా ఆరోపించారు. భేటీ బచావో, భేటీ పడావో పథకం కోసం కేటాయించిన బడ్జెట్‌లో సగం ప్రచారానికే సరిపోయిందని విమర్శించారు. 100 స్మార్ట్ సిటీలు అని ఊదరగొట్టి ఇప్పుడు విస్మరించారని, రైతుల ఆదాయం రెట్టింపు చేస్తామని చెప్పి ఉన్న ఆదాయం తగ్గిపోయేలా చేశారని మండిపడ్డారు.
