ఇంగ్లండ్ వేదికగా ఈ నెలాఖరు నుంచి ప్రారంభంకానున్న ఐసీసీ వరల్డ్ కప్ 2019లో సీనియర్ ఆటగాడు మహేంద్ర సింగ్ ధోని సేవలు జట్టుకు చాలా కీలకమని టీమిండియా కెప్టెన్ విరాట్ కోహ్లీ చెప్పుకొచ్చాడు. జట్టులో ధోనిలాంటి క్రికెటర్ ఉండాల్సిన అవసరం ఎంతైనా ఉందన్నాడు.
దీనిపై కోహ్లీ స్పందిస్తూ, ధోనీ చాలా విలువైన క్రికెటరన్నాడు. అతని ప్రతిభను వెలకట్టలేమన్నాడు. ఇంగ్లండ్ వేదికగా జరుగనున్న వరల్డ్‌కప్‌లో ధోనీ ముఖ్య భూమిక పోషించడం ఖాయమన్నాడు. ఇటీవల కాలంలో కొందరు పనిగట్టుకుని ధోనీని విమర్శిస్తున్నారని, ఇది మంచిది కాదని కోహ్లీ హితవు పలికాడు. భారత్ క్రికెట్‌కు లభించిన ఆణిముత్యాల్లో ధోనీ చెప్పుకొచ్చాడు.
పైగా, అతని సామర్థాన్ని శంకించడం తగదన్నాడు. భారత్‌కు చిరస్మరణీయ సేవలు అందించిన ఘనత అతనికే దక్కుతుందన్నాడు. తనతో పాటు చాలా మంది క్రికెటర్లకు ధోనీనే స్ఫూర్తి అనడంతో సందేహం లేదన్నాడు. ధోనీలాంటి క్రికెటర్‌తో కలిసి ఆడడాన్ని గర్వంగా భావిస్తున్నానని కోహ్లీ స్పష్టం చేశాడు. ధోనీతో తనకు ఎటువంటి విభేదాలు లేవని, తాము మంచి స్నేహితులమని పేర్కొన్నాడు.
