ఆంధ్రప్రదేశ్ రాష్ట్ర శాసనసభకు జరిగిన ఎన్నికల్లో సైకిల్ జోరు కొనసాగుతుందని ఆంధ్రా అక్టోపస్, విజయవాడ మాజీ ఎంపీ లగడపాటి రాజగోపాల్ వెల్లడించారు. ఆయన ఆదివారం సాయంత్రం తిరుపతిలో తనకు చెందిన అర్జీ ఫ్లాష్ నిర్వహించిన ఎగ్జిట్ పోల్ ఫలితాలను వెల్లడించారు.
ఈ సందర్భంగా ఏర్పాటు చేసిన విలేకరుల సమావేశంలో ఆయన మాట్లాడుతూ, శాస్త్రీయ పద్ధతిలో జరిగిన సర్వే వివరాలను ప్రకటిస్తున్నట్టు చెప్పారు. టీడీపీకి మరోసారి అవకాశం ఇవ్వాలన్న కోరికతో ఏపీ ప్రజలు ఉన్నారని అన్నారు. వైసీపీ ప్రతిపక్షంగా గట్టిపోటీ ఇచ్చిందని, ఆ పార్టీ అధికారంలోకి రాకపోయినా సీట్ల సంఖ్య గణనీయంగా రావొచ్చని అభిప్రాయపడ్డారు.
పవర్ స్టార్ పవన్ కల్యాణ్ పార్టీ ‘జనసేన’ మూడో స్థానంలో ఉందని, ఆ పార్టీ ఒక్కో జిల్లాలో ఒక్కోలా ప్రభావం చూపినట్టు తమ సర్వేలో తేలిందని చెప్పారు.
ఏపీ శాసనసభకు జరిగిన ఎన్నికల్లో టీడీపీకి 100 (అటూ ఇటూగా 10 స్థానాలు) రావొచ్చని అన్నారు. వైసీపీ అధికారంలోకి రాకపోయినా గట్టి పోటీ ఇచ్చిందని ఈ ఎన్నికల్లో ఆ పార్టీకి 72 (అటూ ఇటూగా 7 స్థానాలు), ఇతరులు 3 (అటూ ఇటూగా 2 స్థానాలు) వస్తాయని అభిప్రాయపడ్డారు.
ఇకపోతే, లోక్‌సభ ఎన్నికల్లోనూ టీడీపీదేపై చేయిగా ఉంటుందని అన్నారు. టీడీపీకి 15 (అటూ ఇటూగా 2 స్థానాలు) వైసీపీకి 10 (అటూ ఇటూగా 2 స్థానాలు), జెనసేనకు ఒక స్థానం సాధించే అవకాశాలున్నట్టు చెప్పారు. ఈ సందర్భంగా అసెంబ్లీ, పార్లమెంట్ స్థానాల్లో ఆయా పార్టీలకు లభించే ఓట్ల శాతం వివరాల అంచనా వివరాలను తెలిపారు.
అసెంబ్లీ, పార్లమెంట్ స్థానాల్లో ఆయా పార్టీలకు లభించే ఓట్ల శాతం…
టీడీపీ- 43-45 శాతం, వైసీపీ- 40-42 శాతం, జనసేన- 10-12 శాతం చొప్పున ఓట్లు వస్తాయని తెలిపారు.
