తిరుపతి కౌంటింగ్ కేంద్రంలో అగ్నిప్రమాదం సంభవించింది. సోమవారం రాత్రి ఈ ప్రమాదం జరిగింది. ఈ ప్రమాదం కారణంగా ఈవీఎంలతో పాటు.. వీవీ ప్యాట్‌లకు ఎలాంటి ముప్పు జరగలేదని అధికారులు చెప్పారు.
దీనిపై అధికారులు స్పందిస్తూ అగ్నిప్రమాదం వల్ల ఈవీఎంలు, వీవీప్యాట్‌లు ఉన్న గదికి ఎటువంటి సంబంధం లేదని, అవన్నీ భద్రంగానే ఉన్నాయని తెలిపారు. నేతలు ఆందోళన చెందాల్సిన పనిలేదని, కౌంటింగ్ యథావిధిగా కొనసాగుతుందని తెలిపారు.
కాగా, ఈ నెల 23న సార్వత్రిక ఎన్నికల ఫలితాల లెక్కింపునకు సంబంధించి ఏర్పాట్లు చేస్తుండగా తిరుపతి కౌంటింగ్ కేంద్రంలో అగ్నిప్రమాదం జరిగింది. ఏసీలో షార్ట్ సర్క్యూట్ కారణంగా మంటలు ఎగసిపడ్డాయి. రెండు కంప్యూటర్లు, కొన్ని టేబుళ్లు కాలి బూడిదయ్యాయి.
సమాచారం అందుకున్న అగ్నిమాపక సిబ్బంది వెంటనే ఘటనా స్థలానికి చేరుకుని మంటలను అదుపు చేశారు. విషయం బయటకు రావడంతో నేతల్లో ఆందోళన నెలకొంది. ప్రమాదంలో ఈవీఎంలకు నష్టం వాటిల్లి ఉంటుందని టెన్షన్ పడ్డారు. అయితే, వాటికి ఎటువంటి ప్రమాదం జరగలేదని అధికారులు చెప్పడంతో అందరూ ఊపిరి పీల్చుకున్నారు.
