అమరావతి: ఉండవల్లిలో తాను అద్దెకు ఉంటున్న నివాసం నదీ పరీవాహకం కిందికి రాదని తెదేపా అధినేత చంద్రబాబు అన్నారు. గూగుల్‌లో చూసినా కృష్ణా నది భవాని ఐల్యాండ్‌ నుంచి చూపిస్తుందన్నారు. ప్రకాశం బ్యారేజ్‌ ఉండటం వల్ల పాయ చీలి నీరు ఇటువైపునకు వస్తోందని చెప్పారు. అసెంబ్లీ వద్ద చంద్రబాబు మీడియాతో ఇష్టాగోష్ఠిగా మట్లాడారు. కొత్త ప్రభుత్వం వచ్చాక గన్నవరంలో విమాన రాకపోకలు తగ్గిపోయాయని ఆయన ఆరోపించారు. సింగపూర్‌ విమానంతో పాటు చాలా విమానాలను రద్దు చేశారని.. ఎక్కడికి వెళ్లాలన్నా మళ్లీ హైదరాబాద్‌ వెళ్లాల్సిన పరిస్థితి వస్తోందని చంద్రబాబు అన్నారు.
రాజధానిలో ‘రియల్’ ఢమాల్‌..
పులివెందుల తరహాలో పంచాయితీలు చేసి ప్రభుత్వ పాలన సాగించలేరని చంద్రబాబు మండిపడ్డారు. బెదిరింపులకు దిగడం, దౌర్జన్యాలకు పాల్పడటం వంటి పంచాయితీలు పులివెందులలో కుదురుతాయేమోగానీ అమరావతి, ఇతర ప్రాంతాల్లో కుదరవన్నారు. అసెంబ్లీలోనూ సీఎం జగన్ పులివెందుల పంచాయితీల తరహాలోనే వ్యవహరిస్తున్నారని దుయ్యబట్టారు. రాజధాని పరిధిలో దాదాపు రూ.2 లక్షల కోట్ల విలువైన భూమి ఉందన్న ఆయన.. గతంలో బాగా పుంజుకున్న రియల్ ఎస్టేట్ రంగం ఇప్పుడు షేర్ మార్కెట్ మాదిరిగా పడిపోయిందని ఆవేదన వ్యక్తంచేశారు. రాజధాని పరిధిలో వ్యవస్థ అంతా కుదేలవుతోందని, కూలీలకు కూడా పని దొరకడంలేదని చంద్రబాబు విమర్శించారు. పీపీఏలపై స్పందిస్తూ పవన విద్యుత్‌ ధరలు తగ్గించాలని 2018లో పిటిషన్ వేశామని గుర్తుచేశారు. విద్యుత్‌ ధరలు తగ్గించేందుకు తామెంతో కృషి చేస్తే వైకాపా ప్రభుత్వం ఏదేదో మాట్లాడుతోందని ఆయన మండిపడ్డారు.
