హైదరాబాద్: తెలంగాణ శాసనసభ ప్రత్యేక సమావేశాల్లో భాగంగా తెలంగాణ పురపాలక చట్టం-2019పై చర్చ జరుగుతోంది.ఈ చట్టం ఆవశ్యకత, ముఖ్యాంశాలు, లక్ష్యాలు, ఆలోచనలను ముఖ్యమంత్రి కేసీఆర్‌ వివరించారు. ఈ సందర్భంగా ఆయన మాట్లాడుతూ..అవినీతి రహిత పాలన కోసం నూతన పురపాలక చట్టం తెస్తున్నామని చెప్పారు. పంచాయతీ అనేది ఒక విభాగం కాదని, ఓ ఉద్యమమని అన్నారు. గ్రామ స్వరాజ్యం కోసం మహాత్మాగాంధీ కలలు కన్నారని గుర్తు చేశారు. పంచవర్ష ప్రణాళికలపై ప్రతి ఒక్కరికీ అవగాహన ఉండాలని చెప్పారు. ఎమ్మెల్యేలందరికీ శిక్షణ ద్వారా పంచవర్ష ప్రణాళికలపై అవగాహన కల్పిస్తామన్నారు. భారత ప్రజాస్వామ్యం విస్త్రృతమైనదని, మనది చాలా బలమైన ప్రజాస్వామ్య పునాదులున్న దేశమని గుర్తు చేశారు.
భావితరాలకు బతకగలిగే పరిస్థితులను మనం అందించాలని కేసీఆర్‌ అన్నారు. తెలంగాణ పురపాలక చట్టం-2019 ద్వారా పారదర్శకత వస్తుందన్నారు. అవినీతి రహిత మున్సిపల్‌ వ్యవస్థ నిర్మాణమవుతుందని చెప్పారు.పేదల కోసం పౌరసదుపాయాలు కల్పించామన్నారు. ఈ చట్టాన్ని అనుసరించి 75 గజాల లోపు ఇంటి నిర్మాణానికి రిజిస్ట్రేషన్‌ ఫీజు కేవలం రూపాయి మాత్రమే ఉంటుందని, జీ ప్లస్‌ 1 వరకు రూపాయితో రిజిస్ట్రేషన్‌ చేసుకోవచ్చని తెలిపారు.
