రోహిత్‌తో గొడవలు లేవు టీమ్‌ ఇండియా కెప్టెన్‌ కోహ్లి.

మిడిల్‌ ఆర్డర్‌ సమస్యను పరిష్కరించాల్సివుంది. మా టాప్‌ ఆర్డర్‌ చాలా బాగుంది. అందుకే మిడిల్‌ ఆర్డర్‌కు ఎక్కువ అవకాశాలు రావట్లేదు. వచ్చిన కొన్ని అవకాశాలను వాళ్లు సద్వినియోగం చేసుకోలేకపోయారు. దీంతో ప్రతి ఒక్కరూ వారిపై వేలెత్తి చూపెట్టడం మొదలెట్టారు. జట్టులో 11 మందీ రాణించాలని మేం కోరుకుంటాం. అది జరగనప్పుడు ఏదో ఒక విభాగాన్ని వేలెత్తి చూపిస్తారు. ఎప్పుడో ఒకసారి అవకాశం వచ్చినప్పుడు మిడిల్‌ ఆర్డర్‌ బ్యాట్స్‌మన్‌ విఫలమైతే.. ఆ ప్రదర్శన ఆధారంగా అతడిపై ఓ నిర్ణయానికి రావడం అన్యాయం. మిడిల్‌ ఆర్డర్‌లో నిలకడగా రాణించే బ్యాట్స్‌మెన్‌ కోసం చూస్తున్నాం. అలాంటి ఆటగాళ్లు జట్టులో ఉన్నారు. జట్టంతా రాణించడం వల్లే ప్రపంచకప్‌లో సెమీఫైనల్‌దాకా వెళ్లాం. గత కొన్నేళ్లలో కూడా మెరుగైన ప్రదర్శన చేశాం. మిడిల్‌ ఆర్డర్‌ గురించి మరీ ఆందోళన చెందాల్సిన అవసరం లేదు.

వన్డే ప్రపంచకప్‌ తర్వాత విశ్రాంతి గురించి ఎవరూ నాతో మాట్లాడలేదు. ఫిజియో లేదా ట్రెయినర్‌ నాకు విశ్రాంతి అవసరమని చెప్పలేదు. సెలక్టర్లకు ఎలాంటి సమాచారం వెళ్లిందో నాకు తెలియదు. ఇప్పుడు జట్టంతా ఒక్క దగ్గర ఉండడం ముఖ్యం. ప్రపంచకప్‌ ఫైనల్‌ చేరలేకపోయినందుకు జట్టులో అంతా నిరాశపడ్డారని తెలుసు. కానీ ఇక దాని గురించి ఆలోచించకుండా ముందుకు సాగిపోవాలి.

దక్షిణాఫ్రికాతో టెస్టు సిరీస్‌లో రహానెను కాదని రోహిత్‌ శర్మను ఎంచుకున్నాం. రోహిత్‌ ఆడుతున్న తీరే అందుకు కారణం. కానీ రహానె కూడా చాలా మంచి ఆటగాడు. స్లిప్‌లో మంచి ఫీల్డర్‌ కూడా. అప్పుడే అతడిపై ఓ నిర్ణయానికి రావొద్దు. ముందు ముందు అతడు కూడా వన్డే జట్టులోకి రాగలడు.

వచ్చే ఏడాది జరిగే టీ20 ప్రపంచకప్‌పై మేం దృష్టి పెట్టాల్సి ఉంటుంది. కానీ టెస్టు ఛాంపియన్‌షిప్‌ నేపథ్యంలో టెస్టులపైనా దృష్టిసారించాలి.

టెస్టు ఛాంపియన్‌షిప్‌ వల్ల టెస్టు  క్రికెట్‌కు మరింత ప్రచారం వస్తుంది. ఇది ఆటగాళ్లకు ఉత్తేజాన్నిస్తుంది. సవాళ్లనూ విసురుతుంది. ఈ ఛాంపియన్‌షిప్‌లో ఆడిన అనుభవంతో వాళ్లు చాలా నేర్చుకుంటారు. వన్డే జట్టు దాదాపు సమతూకంగా ఉంది. కొంతకాలంగా మెరుగైన ప్రదర్శన చేస్తోంది. టెస్టు జట్టు గురించి వేరే చెప్పక్కర్లేదు. కాబట్టి మూడు మ్యాచ్‌ల టీ20 సిరీస్‌ నాకు చాలా ఉత్తేజం కలిగిస్తోంది. ఎందుకంటే చాలా మంది కొత్త ఆటగాళ్లు జట్టులోకి వచ్చారు. సత్తా చాటుకోవడానికి కొత్త కుర్రాళ్లకు వెస్టిండీస్‌తో టీ20 సిరీస్‌ ఓ చక్కని అవకాశం. ఐపీఎల్‌, దేశవాళీ టోర్నీల్లో సత్తా చాటిన ఆటగాళ్లు జట్టులో ఉన్నారు. అక్కడ వాళ్లు ఒత్తిడిలో చాలా సంయమనాన్ని ప్రదర్శించారు. వెసిండీస్‌లో క్రికెట్‌ ఆడితే బాగుంటుంది. అక్కడ చాలా ప్రశాంతంగా ఉంటుంది. అక్కడ క్రికెట్‌ ఆడడాన్ని చాలా ఆస్వాదించాం.

రవి భాయ్‌తో మా అందరికీ మంచి బంధం ఉంది. అతణ్నే కోచ్‌గా కొనసాగిస్తే చాలా సంతోషిస్తాం. కానీ కోచ్‌పై నిర్ణయం తీసుకోవాల్సింది క్రికెట్‌ సలహా కమిటీ (సీఏసీ)నే. ఈ విషయంపై సీఏసీ ఇప్పటివరకు నన్ను సంప్రదించలేదు. నా అభిప్రాయం అడిగితే చెబుతా.

– రవిశాస్త్రి, భారత జట్టు కోచ్‌