మీ అందరికీ నేనంటే భలే ఇష్టం కదూ… ఎంత ఇష్టం లేకపోతే నెమలీకలంటూ నా ఈకల్ని పుస్తకాల్లో దాచుకుంటారు? వాటిని మధ్య మధ్యలో మీ స్నేహితులకీ చూపించి ముచ్చటపడిపోతుంటారు? అందుకేనర్రా! మీతో ఓసారి మనసారా మాట్లాడదామని ఇలా వచ్చేశా!
పచ్చ, నీలం రంగుల్లో మెరిసిపోతూ ఉండే నా రూపం అంటే మీకే కాదు నాకూ ముచ్చటగానే ఉంటుంది. మీలో కొంతమంది నన్ను నేరుగా చూసే ఉంటారు. దట్టంగా చెట్లు ఉండే ప్రాంతాలు, కొండకోనలు, అడవుల్లో ఉంటాం మేము.
ఈకల రంగుల వెనక!
* మాలో మగ వాటికే పొడవాటి అందమైన తోకలుంటాయి. అవే మీరు పుస్తకాల్లో దాచుకునే నెమలీకలు. మా శరీరంలో ఆ తోకే 60శాతం ఉంటుంది. ఆడవాటికి ఎక్కువ రంగులు, పొడవాటి తోకలూ ఉండవు.
పిడికెడంత పిల్ల!
* మేం మూడు నుంచి ఐదు వరకూ గుడ్లు పెడతాం. వాటిని 28 రోజుల పాటు పొదిగి పిల్లల్ని చేస్తాం.
