ప్రపంచం సాంకేతికత చుట్టూ తిరుగుతున్న రోజులివి…..

August 1, 2019

‘వేగంగా, కచ్చితమైన ఫలితాలతో ముందుకు దూసుకెళ్లేతత్వం అమెరికా విద్యావిధానంలో భాగం’ అంటోంది- మేనేజ్‌మెంట్‌ ఇన్ఫర్మేషన్‌ సైన్సెస్‌ కోర్సులో పీజీ చేస్తున్న మాధురి పొడిపిరెడ్డి. తను చదువుతున్న యూనివర్సిటీ ఆఫ్‌ ఇల్లినాయిస్‌ (యూఐఎస్‌) ప్రత్యేకతలు, విశేషాలను ‘క్యాంపస్‌ మెయిల్‌’ శీర్షిక ద్వారా ఆమె ఇలా పంచుకుంటోంది…
ప్రపంచం సాంకేతికత చుట్టూ తిరుగుతున్న రోజులివి. ఆ సాంకేతికతను సరైన రీతిలో పరిశ్రమలకు అందించే వ్యాపార నైపుణ్యాలను మెరుగుపరచుకునేందుకూ, ప్రపంచీకరణ సవాళ్లను అధిగమించేందుకూ నాణ్యమైన విద్య అవసరం. ఆ స్థాయి విద్య లభించే దేశాల్లో అమెరికా ఒకటి. అందుకే ఎక్కువమంది విద్యార్థులు యూఎస్‌ను ఎంచుకుంటున్నారు. చిన్నతనంలో చెన్నైలో చదివాను. తర్వాత కాకినాడ ప్రగతి ఇంజినీరింగ్‌ కళాశాలలో బీటెక్‌ పూర్తిచేశాను. మంచి జీఆర్‌ఈ స్కోరు సాధించి స్ప్రింగ్‌ ఫీల్డ్‌లోఉన్న యూనివర్సిటీ ఆఫ్‌ ఇల్లినాయిస్‌ (యూఐఎస్‌)లో మేనేజ్‌మెంట్‌ ఇన్ఫర్మేషన్‌ సైన్సెస్‌ కోర్సులో చేరాను. షికాగో స్టేట్‌కి మూడు గంటల ప్రయాణ దూరంలో మా యూనివర్సిటీ ఉంది. అమెరికా సంస్కృతిలో బాగా నచ్చేవి- క్రమశిక్షణ, కాలానికి వారిచ్చే విలువ, మహిళల పట్ల గౌరవ మర్యాదలు. మర్యాద పాటించడంలో, ఎదుటి వ్యక్తికి గౌరవం ఇవ్వడంలో వారికి వారే సాటి. చిన్నవారికైనా తలుపు తెరిచి ఆహ్వానించడం, కుర్చీని మనవైపు జరిపి కూర్చోమని చెప్పడం వంటి వాటిద్వారా వారిచ్చే ఆతిథ్యానికి ముగ్ధులమవుతాం. మంచి స్నేహపూర్వక వాతావరణాన్ని కల్పిస్తారు.
బోధన ఎంతో వినూత్నం
అమెరికా విద్యావిధానం మన తెలివితేటలకూ, నైపుణ్యాలకూ పదునుపెడుతుంది. విద్యార్థులకు ఎప్పటికప్పుడు నూతన ప్రక్రియలను పరిచయం చేస్తూ వారిలో సృజనాత్మకత, భావవ్యక్తీకరణ, తార్కిక, లౌకిక అంశాలపై పట్టు సాధించేలా ప్రోత్సహిస్తుంది. ప్రయోగ పద్ధతిలో నేర్పే చదువుకే ప్రాముఖ్యం! ఇదెంతో కీలకం. ప్రతి పనికీ సాంకేతికతను ఉపయోగించడం ఇక్కడి విద్యావిధానంలో ముఖ్యమైంది. ప్రతి 25 మంది విద్యార్థులకు ఒక ప్రొఫెసర్‌ ఉంటారు. వారిపై ప్రత్యేక దృష్టిసారిస్తారు. ప్రెజెంటేషన్స్‌, స్ట్రక్చర్డ్‌ అసైన్‌మెంట్స్‌, బృందచర్చల్లో పాల్గొనడం వల్ల విద్యార్థులు తమ నైపుణ్యాలను మెరుగుపరచుకోగలుగుతారు. వారానికి మూడు రోజులు క్లాసులకు హాజరు కావడం, మిగిలిన రోజులు సంస్థలో పనిచేయటం ఉంటుంది. ఓర్పు, సమయపాలన, క్రమశిక్షణ, నాయకత్వ లక్షణాలు, పరస్పర సహకారం ఇక్కడ పెంపొందుతాయి.

ఇంటర్న్‌షిప్‌తో ఫీజుకు వెసులుబాటు
అవకాశాలు అందించడంలోనూ ఈ దేశానిది అందె వేసిన చేయి. ఇండియన్‌ స్టూడెంట్‌ ఆర్గనైజేషన్‌, ఎస్‌ప్లస్‌ యోగా క్లబ్‌ల అధ్యక్ష పదవికి ఎంపికయ్యాను. అంతర్జాతీయ విద్యార్థుల స్నేహితుల విభాగానికి కోశాధికారిగా కొనసాగుతూనే గ్రాడ్యుయేట్‌ పబ్లిక్‌ సర్వీస్‌ ఇంటర్న్‌షిప్‌ స్టూడెంట్‌ అసోసియేషన్‌కు సెక్రటరీగా ఎంపికయ్యాను. వివిధ దేశాల నుంచి వచ్చే విద్యార్థులు తమ ప్రతిభను చూపి అమెరికా ప్రభుత్వ సంస్థల్లో రెండేళ్లపాటు ఉద్యోగం చేసుకుని తమ ఫీజును తామే చెల్లించుకుంటూ చదువుకునే విధానం ఇది. ఇదోరకమైన ఇంటర్న్‌షిప్‌. కొత్తగా చేరిన విద్యార్థులకు మార్గదర్శకంగా ఉంటూ వారు ఈ ప్రక్రియలో విజయం సాధించేలా తోడ్పాటునందించాను.మొదట్లో వేరే సంస్కృతిలో ఇమడటం నాలాంటి విద్యార్థులకు ఇబ్బందిగా ఉంటుంది. విదేశీ వస్త్ర విధానం, వాతావరణం, ఆహారం, పద్ధతులు కొంత అడ్డంకులుగా నిలిచినా వాటిని కాలానుగుణంగా అధిగమించి నిలదొక్కుకోగలుగుతాం.

నాయకత్వ లక్షణాలపై దృష్టి

స్ప్రింగ్‌ ఫీల్డ్‌ అనేది అబ్రహాం లింకన్‌ జన్మస్థలం. ఈ పట్టణం చాలా విశాలంగా, రంగు రంగుల పూలచెట్లతో ఏడాదిలో 8 నెలలు మంచుతో ప్రశాంతంగా ఉంటుంది. ఇక్కడ ఎవరి పనులు వారు చేసుకుంటూ ఇతరులకు ఇబ్బంది కలగకుండా వ్యవహరిస్తారు. విశ్వవిద్యాలయంలో విద్యార్థులకు నాయకత్వ లక్షణాలు పెంపొందించడంలోనే ఎక్కువ దృష్టిసారిస్తారు. ప్రొఫెసర్లు అందరిపట్లా వ్యక్తిగత శ్రద్ధవహించి కొత్తగా వచ్చే విద్యార్థులకు తోడ్పాటునందిస్తారు. ఇంటి బెంగ లేకుండా అందరితో కలిసిమెలసి ఉండే వాతావరణం నెలకొల్పుతారు. క్యాంపస్‌లో అన్నిరకాల పండుగలకూ ప్రాముఖ్యమిస్తారు. మా క్యాంపస్‌లో ఎక్కువగా భారతీయులు, చైనీస్‌, జపనీస్‌, కొరియన్స్‌ ఉంటారు. ఇక్కడ విద్యార్థులు ‘హాస్పిటల్‌ సిస్టర్‌ మిషన్‌’ అనే కార్యక్రమం ద్వారా పరిశ్రమల నుంచి వచ్చిన మందులను వేరుచేస్తూ కావాల్సిన విభాగాలకు స్వచ్ఛందంగా అందిస్తారు.

Latest article

EDITOR PICKS

POPULAR POSTS

POPULAR CATEGORY