కుష్ఠువ్యాధి బాధితుల కోసం జీవితాంతం కృషి చేసిన దామోదర్ గణేశ్ బాపట్(87) శనివారం కన్నుమూశారు. గత కొద్దికాలంగా ఆరోగ్య సమస్యలతో బాధపడుతున్న ఆయన బిలాస్‌పూర్‌లోని అపోలో ఆస్పత్రిలో తుదిశ్వాస విడిచారు. తన 87ఏళ్ల జీవితకాలంలో 47ఏళ్ల పాటు కుష్ఠువ్యాధి బాధితులకు సేవలు అందించారు. 1972 నుంచి కుష్ఠువ్యాధిగ్రస్తుల సేవలో ఉన్నారు. కాట్రేనగర్ చంపాలో సొంత ఆశ్రమాన్ని ఏర్పాటు చేసిన ఆయన.. సామాజికంగానూ, ఆర్థికంగానూ వారి జీవితాల్లో మార్పుకు కృషి చేశారు. ఆయన సేవలకుగానూ 2018లో భారతప్రభుత్వం పద్మశ్రీ అవార్డుతో సత్కరించింది.
