‘మహానటి’తో జాతీయ ఉత్తమ నటి పురస్కారాన్ని అందుకుంది కీర్తి సురేష్‌. ప్రస్తుతం ఆమె ప్రధాన పాత్రధారిగా ఈస్ట్‌ కోస్ట్‌ ప్రొడక్షన్స్‌ పతాకంపై ఓ చిత్రం తెరకెక్కుతోంది. నరేంద్రనాథ్‌ దర్శకుడు. మహేష్‌ కోనేరు నిర్మాత. ఇటీవలే యూరప్‌లో కీలక సన్నివేశాల్ని తెరకెక్కించారు. ఈ చిత్రానికి ‘మిస్‌ ఇండియా’ అనే పేరును ఖరారు చేసినట్టు ప్రకటించడంతో పాటు ఫస్ట్‌లుక్‌ని విడుదల చేసింది చిత్రబృందం. నిర్మాత మాట్లాడుతూ ‘‘కీర్తి సురేష్‌ నుంచి ఇప్పుడు ప్రేక్షకులు ఎలాంటి సినిమాని కోరుకుంటారో, అలాంటి సినిమానే ‘మిస్‌ ఇండియా’. ప్రతి అమ్మాయి తన జీవితంలో ఎక్కడో ఒక చోట ఎదుర్కొనే పరిస్థితుల నేపథ్యంలో దర్శకుడు చిత్రాన్ని తెరకెక్కిస్తున్నారు. మహిళలతో పాటు అన్ని వర్గాల ప్రేక్షకులకు నచ్చేలా ఉంటుందీ చిత్రం. కీర్తి సురేష్‌ జాతీయ పురస్కారాన్ని గెలుచుకొన్నాక నటిస్తున్న తొలి చిత్రం మా సంస్థలోనే కావడం ఎంతో ఆనందంగా ఉంది. ఇప్పటికే సింహభాగం చిత్రీకరణ పూర్తయింది. మిగిలిన భాగాన్ని పూర్తిచేసి, అక్టోబరు లేదా నవంబరులో చిత్రాన్ని విడుదల చేస్తాం’’ అన్నారు. ‘‘కీర్తి సురేష్‌ మాత్రమే న్యాయం చేయగల కథ ఇది. అందుకే ఈ కథ సిద్ధమయ్యాక ఆమెకి వినిపించగానే నచ్చి ఒప్పుకొన్నారు. అన్ని రకాల భావోద్వేగాలున్న చిత్రం’’ అన్నారు దర్శకుడు. ఈ చిత్రానికి సంగీతం: తమన్‌.
