అది అమీర్‌పేట మెట్రో స్టేషన్‌! జోరుగా వర్షం పడుతోంది. అప్పుడే తన సోదరితో కలిసి మెట్రోరైలు దిగిన ఓ యువతి.. తడవకుండా ఉండేందుకు మెట్రో పిల్లర్‌ కిందకు వెళ్లింది. అదే ఆమె చేసిన తప్పయింది. కొద్దిసేపటికే పైనుంచి పెచ్చులు ఊడి నేరుగా ఆమె తలపై పడ్డాయి. అంతెత్తు నుంచి పడ్డ ఆ రాకాసి పెచ్చుల ధాటికి ఆమె తల పగిలింది. తీవ్ర గాయాలతో అక్కడిక్కడే కుప్పకూలి రక్తపుమడుగులో గిలగిలాకొట్టుకుంది. వెంటనే ఆస్పత్రికి తరలించినా అప్పటికే ఆమె ప్రాణాలు విడిచింది. ఆదివారం మధ్నాహ్నం అమీర్‌పేట మెట్రోస్టేషన్‌ కింద చోటు చేసుకున్న ఈ ఘటన స్థానికులను హతాశులను చేసింది. మృతురాలిని కూకట్‌పల్లిలో నివాసం ఉంటున్న మౌనిక (26)గా గుర్తించారు. స్థానికులు, పోలీసుల వివరాల ప్రకారం.. మౌనిక స్వస్థలం మంచిర్యాల జిల్లా శ్రీరాంపూర్‌. భర్త కంతాల హరికాంత్‌ రెడ్డి. ఏడాది క్రితమే వీరికి పెళ్లయింది.
