దుర్గా ఆర్ట్స్‌ బ్యానర్‌పై నాగార్జున, వెంకటేష్ లాంటి హీరోలతో పలు హిట్ చిత్రాలను నిర్మించిన ప్రముఖ నిర్మాత కేఎల్‌ నారాయణ ఇంటిపై ఐటీ అధికారులు దాడులు చేశారు. కృష్ణా జిల్లాలోని పెదగొన్నూరులోని ఆయన స్వగృహంలో ఈ సోదాలు జరిగాయి. ఇన్‌కం ట్యాక్స్‌ డిపార్ట్‌మెంట్‌ అసిస్టెంట్‌ కమిషనర్‌ ఎం. శ్వేత ఆధ్వర్యంలో గురువారం ఈ సోదాలు జరిగాయి. అయితే సోదాలు ఇంకా పూర్తి కాలేదని మరో రెండు బీరువాలు తెరవాల్సి ఉందని అధికారులు వెల్లడించారు.
ప్రస్తుతం కేఎల్‌ నారాయణ హైదరాబాద్‌లో ఉన్నారు. ఆయన శుక్రవారం గ్రామానికి చేరుకుంటారు ఆ తరువాత రెండు బీరువాలను కూడా సోదా చేసిన తరువాత పూర్తి వివరాలు వెల్లడిస్తామని అధికారులు తెలిపారు. అయితే నారాయణ ఇంట్లో సోదాలు జరుగుతున్న సమయంలోనే హైదరాబాద్‌, విజయవాడల్లోని ఆయన ఇతర వ్యాపార కార్యాలయాలు, ఇళ్లలో సోదాలు జరిగినట్టుగా తెలుస్తోంది.
