తెలంగాణ ప్రభుత్వానికి కేంద్రం మరో షాక్ ఇచ్చింది. ఇప్పటికే ఆర్టీసీ సమ్మెతో తలపట్టుకుంటున్న గులాబీ బాస్‌కు కేంద్రం డబుల్ బెడ్రూం ఇళ్ల నిర్మాణం నిధుల విషయంలో కొర్రీలు పెడుతోంది. ఈ పథకం కోసం కేంద్రం నుంచి రెండు, మూడు దశల కింద రావాల్సిన రూ.1800 కోట్లను విడుదల చేసేందుకు మోదీ సర్కార్ ససేమిరా అంటోంది. 8 నెలలుగా నిధుల కోసం అడుుతుంటే… లబ్ధిదారుల జాబితా ఇస్తేనే నిధులు ఇస్తామని కేంద్ర ప్రభుత్వం కరాఖండీగా చెబుతోంది. డబుల్ బెడ్రూం ఇళ్లకు మొదటి విడతలో రూ.1200 కోట్లు విడుదల చేసిన ప్రభుత్వం రెండు, మూడు విడతల్లో మాత్రం నిధుల విడుదలకు అభ్యంతరాలు చెబుతోంది.
ఒక్కో డబుల్ బెడ్రూం ఇంటికి దాదాపు రూ. 9 లక్షలు ఖర్చవుతుండగా, కేంద్రం తన వంతుగా లక్షన్నర రూపాయలు ఇస్తోంది. జీహెచ్ఎంసీ పరిధిలో నిర్మిస్తున్న లక్ష ఇళ్లకు కేంద్రం నుంచి ఇంకా రూ.1500 కోట్లు రావాల్సి ఉంది. అయితే ఇందులో మొదటి విడత కింద రూ.600 కోట్లు విడుదల చేసిన ప్రభుత్వం ఇంకా రూ.900 కోట్లతోపాటు ఇతర జిల్లాలో నిర్మిస్తున్న ఇళ్లకు సంబంధించి మరో రూ.900 కోట్లు ఇవ్వాల్సి ఉంది. ఇప్పుడీ నిధుల విడుదల విషయంలో కొర్రీలు పెడుతూ లబ్ధిదారుల జాబితాను తీసుకురమ్మని చెబుతోంది. ఆ జాబితా ఇస్తేనే నిధుల విడుదల గురించి ఆలోచిస్తామని తేల్చి చెప్పడంతో ప్రభుత్వం దిక్కుతోచని స్థితిలో పడిపోయింది.
