మాజీ మంత్రి పరిటాల రవీంద్ర హత్య కేసుకు సంబంధించి అనంతపురం జిల్లా తెలుగు యువత మాజీ అధ్యక్షుడు కందిగోపుల మురళి సంచలన వ్యాఖ్యలు చేశారు. ఈ మేరకు శనివారం ఆయన మీడియాతో మాట్లాడుతూ.. పరిటాల రవి హత్య కేసులో మాజీ మంత్రి, టీడీపీ నాయకుడు జేసీ దివాకర్ రెడ్డి పాత్ర ఉందని తెలిపారు. పరిటాల హత్యకు ఉపయోగించిన తుపాకులను జేసీ దివాకర్ రెడ్డి సరఫరా చేశారని వ్యాఖ్యానించారు.
హత్య జరిగిన రోజు ఘటనా స్థలంలో లభ్యమైన రివాల్వర్‌ కూడా జేసీ ఇచ్చిందేనని కందిగోపుల మురళి చెప్పారు. తాను జేసీ దివాకర్‌రెడ్డి వద్ద చాలాకాలం పనిచేశానని వివరించారు. పరిటాల రవి హత్యలో జేసీ పాత్రపై విచారించాలని గతంలో మాజీ మంత్రి పరిటాల సునీత తండ్రి కొండన్న పోలీసులకు ఫిర్యాదు చేసినట్లు గుర్తు చేశారు. రాష్ట్ర ముఖ్యమంత్రి వైఎస్‌ జగన్‌‌మోహన్‌రెడ్డిని విమర్శించే నైతిక హక్కు జేసీకి లేదని మురళి చెప్పారు. జిల్లాలో జేసీ చేస్తున్న క్రిమినల్‌ రాజకీయాలపై బహిరంగ చర్చకు రావాలని సవాల్‌ విసిరారు. కాగా, అనంతపురం జిల్లా యాడికిలోని జేసీకి చెందిన ‘త్రిశూల్ సిమెంట్స్’ సంస్థకు 2007లో వైఎస్సార్ సర్కారు కేటాయించిన మైనింగ్ లీజులో అక్రమాలు జరుగుతున్నాయని కందిగోపుల మురళి ప్రసార్‌రెడ్డి కోర్టులో పిటిషన్ వేసి పోరాటం చేస్తున్నారు. తాజాగా, శుక్రవారం వైఎస్సార్‌సీపీ ప్రభుత్వం ‘త్రిశూల్ సిమెంట్స్’ లీజును రద్దు చేసిన విషయం తెలిసిందే.
