దేశంలో కరోనా వైరస్ వేగంగానే విస్తరిస్తోంది. బుధవారం ఒక్క రోజే 21 కేసులు నమోదుకావడం ఆందోళనకు గురిచేస్తోంది. ఐటీబీపీ శిబిరంలో ఉన్న 21 మంది అనుమానితుల్లో 15 మందికి వైరస్ ఉన్నట్టు ఢిల్లీలోని ఎయిమ్స్ వైద్యుల పరీక్షల్లో వెల్లడయ్యింది. తాజాగా, రెండు రోజుల కిందట కరోనా వైరస్ సోకిన వ్యక్తి బంధువుల్లో ఆరుగురికి వైరస్ ఉన్నట్టు గుర్తించారు. కోవిడ్ తాజా పరిస్థితి గురించి కేంద్ర ఆరోగ్య శాఖ మంత్రి హర్ష్‌వర్ధన్ మీడియాతో మాట్లాడుతూ.. ఢిల్లీ బాధితుడి బంధువుల్లో ఆరుగురి నమూనాల్లో కరోనా వైరస్ ఉన్నట్టు పరీక్షల్లో వెల్లడయ్యిందన్నారు. బాధితుడితో 68 మంది కాంటాక్ట్ అయ్యారని తెలిపారు. విదేశాల నుంచి వచ్చే అన్ని విమానాలను స్క్రీనింగ్ నిర్వహిస్తామని కేంద్ర మంత్రి వివరించారు.
కరోనా అనుమానిత కేసుల కోసం అన్ని హాస్పిటల్స్‌లో అత్యున్నత ప్రమాణాలతో ప్రత్యేక వార్డులు ఏర్పాటుచేయాలని ఢిల్లీ ప్రభుత్వాన్ని కోరినట్టు వివరించారు. తమ ప్రయత్నాలకు ఇరాన్ ప్రభుత్వం సహకరిస్తే అక్కడ కూడా ఒక టెస్ట్ ల్యాబ్‌ను ఏర్పాటుచేసే ఉద్దేశంతో ఉన్నామని, సమగ్ర స్క్రీనింగ్ తర్వాత ఇరాన్ నుంచి భారతీయులు స్వదేశానికి తిరిగి రావడానికి వీలవుతుందని కేంద్ర మంత్రి అన్నారు. మొత్తం 28 కేసుల్లో ఢిల్లీ (1), ఆగ్రా (6), ఐటీబీపీ కేంద్రంలో (17), తెలంగాణ (1), కేరళ మూడు. ఐటీబీపీ కేంద్రంలోని 16 మంది ఇటలీ పౌరులు, ఒక భారతీయ డ్రైవర్‌కు కరోనా వైరస్ నిర్ధారణ అయ్యింది. తెలంగాణలో 47 మంది శాంపిల్స్‌ను సేకరించగా 45 నమూనాల్లో వైరస్ లేదని తేలింది. మరో ఇద్దరికి సంబంధించిన ఫలితాలు రావాల్సి ఉంది. అయితే, వీరికి వైరస్ పాజిటివ్ అని వచ్చినట్టు తెలుస్తోంది. ఇదిలా ఉండగా.. కరోనా వైరస్ గురించి బుధవారం మధ్యాహ్నం 3 గంటలకు ఉన్నతస్థాయి సమావేశం ఏర్పాటుచేసినట్టు వివరించారు. నిర్మాణ భవన్‌లో కేంద్ర మంత్రుల సమావేశం కానున్నారు. మరోవైపు, భారత్ నుంచి పౌరులు పూర్తిస్థాయి వైద్య పరీక్షలు చేయించుకుని సర్టిఫికెట్‌తో సహా రావాలని కువైట్ ప్రభుత్వం ఆదేశాలు జారీచేసింది. తమకు కోవిడ్ లేదని నిర్ధారణ అయిన తర్వాతే కువైట్‌లో అడుగుపెట్టాలని సూచించింది.
