రైల్లో అకస్మాత్తుగా మంటలు చెలరేగడంతో రెండు బోగీలు తగలబడ్డాయి. మౌలాలి రైల్వే స్టేషన్‌లో శనివారం (మార్చి 14) మధ్యాహ్నం ఈ ప్రమాదం చోటు చేసుకుంది. అగ్నిప్రమాదం జరిగిన సమయంలో రైలు ఆగి ఉండటం, బోగీల్లో ప్రయాణికులెవరూ లేకపోవడంతో ప్రమాదం తప్పింది. సమాచారం అందుకున్న అగ్నిమాపకదళ సిబ్బంది వెంటనే ఘటనా స్థలానికి చేరుకున్నారు. 3 ఫైర్ ఇంజన్లతో మంటలను అదుపులోకి తీసుకొచ్చారు. ఈ ప్రమాదంలో ఒక బోగి పూర్తిగా మంటల్లో కాలిపోగా.. మరో బోగీ పాక్షికంగా దగ్ధమైంది. అగ్నిప్రమాదానికి గల కారణాలు తెలియాల్సి ఉందని అధికారులు తెలిపారు. ఘటనపై రైల్వే పోలీసులు కేసు నమోదు చేసి దర్యాప్తు చేస్తున్నారు. ప్రమాదానికి గురైన ట్రెయిన్.. ఢిల్లీ నుంచి హైదరాబాద్‌కు తీసుకొస్తున్న ప్రత్యేక రైలని తెలుస్తోంది. అందువల్ల రైల్లో ప్రయాణికులెవరూ లేరని సమాచారం. పూర్తి వివరాలు తెలియాల్సి ఉంది.
