ప్రేమించిన యువతి మరొకరిని వివాహం చేసుకుంటోందని తెలుసుకుని గుండె బద్దలైన ఓ యువకుడు ఆత్మహత్య చేసుకున్న ఘటన హైదరాబాద్‌లో వెలుగుచూసింది. మంచిర్యాల జిల్లా మందమర్రికి చెందిన సదానందం(23) నగరంలోని ఓ ఆస్పత్రిలో ల్యాబ్ టెక్నీషియన్‌గా పనిచేస్తూ నాచారంలో ఉంటున్నాడు. అతను కొన్నాళ్ల నుంచి ఓ యువతిని ప్రేమించాడు. ఆమెకు ఇటీవల మరో యువకుడితో వివాహ నిశ్చితార్థమైంది. ఈ నెల 16న ఆమె వివాహం జరుగుతున్నట్లు తెలుసుకున్నాడు.
15న రాత్రి స్నేహితులతో కలసి మద్యం తాగుతూ ప్రేమించిన అమ్మాయి మరొకరిని వివాహం చేసుకుంటుందని బాధపడ్డాడు. స్నేహితులు అతనికి ధైర్యం చెప్పి పడుకోబెట్టారు. సోమవారం ఉదయం మౌలాలి- చర్లపల్లి రైల్వేస్టేషన్ల మధ్య రైలు పట్టాల పక్కన గుర్తుతెలియని వ్యక్తి మృతదేహాన్ని గమనించిన రైల్వే కీమాన్‌ విషయాన్ని సికింద్రాబాద్ జీఆర్పీ పోలీసులకు సమాచారమిచ్చాడు. పోలీసులు మృతదేహాన్ని స్వాధీనం చేసుకుని పరిశీలించగా మృతుడి వద్ద ఆధారాలు లభించలేవు. దీంతో మృతదేహాన్ని గాంధీ ఆస్పత్రిలోని మార్చురీకి తరలించారు.
ఆ రోజు నుంచి కుటుంబ సభ్యులు సదానందంకు ఫోన్‌ చేయగా స్విచ్చాఫ్ వస్తోంది. దీంతో సోమవారం సాయంత్రం వారు నాచారం పోలీసులకు ఫిర్యాదు చేశారు. మిస్సింగ్‌ కేసు నమోదు చేసుకున్న పోలీసులు దర్యాప్తు చేస్తుండగా సికింద్రాబాద్ జీఆర్పీ పోలీసులు తమ వద్ద గుర్తుతెలియని యువకుడి మృతదేహం ఉందని సమాచారం ఇచ్చారు. మృతదేహం ఫొటోను నాచారం పోలీసులకు పంపించగా అదృశ్యమైన యువకుడి ఫొటో మృతుడి ఫొటో ఒకేలా ఉండటంతో విషయాన్ని పోలీసులు అతడి కుటుంబసభ్యులకు చెప్పారు.
మంగళవారం సికింద్రాబాద్ రైల్వేస్టేషన్‌కు వచ్చిన మృతుడి కుటుంబసభ్యులకు మార్చురీలోని మృతదేహాన్ని పోలీసులు చూపించగా సదానందంగా గుర్తించారు. దీంతో వారు మృతుడి స్నేహితులను ఆరా తీశారు. ప్రేమించిన యువతి మరొకరితో వివాహం చేసుకుందని ముందురోజు రాత్రే తమ వద్ద బాధపడ్డాడని వారు చెప్పారు. దీంతో లవ్ ఫెయిల్యూర్ కారణంగానే అతడు ఆత్మహత్య చేసుకున్నట్లు పోలీసులు గుర్తించారు.
