ప్రపంచ వ్యాప్తంగా కరోనా వైరస్ కలకలం సృష్టిస్తోంది. భారతేదశంలో కూడా ఈ మహమ్మారి వ్యాపిస్తోంది. ఇప్పటికే ముగ్గురు ఈ వ్యాధి బారిన పడి ప్రాణాలు కోల్పోయారు. తెలంగాణలో కూడా కరోనా పాజిటివ్ కేసుల సంఖ్య ఆరుకు చేరింది. అటు ఏపీలో కూడా కరోనా అనుమానిత కేసులు రోజురోజుకు పెరిగిపోతున్నాయి. ఇప్పటివరకు ఏపీలో ఒక పాజిటివ్ కేసు నమోదు అయ్యింది. మరోవైపు వైరస్ వ్యాపిస్తున్న నేపథ్యంలో విశాఖ శారదాపీఠంలో ప్రత్యేక యాగాలు ప్రారంభించారు.
ఇవాళ విశాఖ శారదాపీఠంలో యోగవానిష్టం ప్రారంభించారు. కరోనా వైరస్ నిర్మూలన కోసం 11 రోజుల పాటు విష, జ్వర, పీడ హర యజ్ఞయాగాదులు నిర్వహిస్తున్నారు. సామాజిక స్పృహతోనే ఈయాగం చేపట్టామని చెబుతున్నారు స్వామి స్వాత్మానందేంద్ర. శాస్త్ర గ్రంధాల్లో సూచించిన మేరకు యాగం నిర్వహిస్తున్నామని తెలిపారు. ఆరోగ్యకరమైన సమాజమే విశాఖ శారదాపీఠం ఆకాంక్ష అన్నారు స్వామి స్వాత్మానందేంద్ర.
కరోనా వ్యాప్తి చెందకుండా నివారించేందుకు అమృత పాశు పత సహిత, విష జ్వర హర యాగాన్ని ఇవాల్టి నుంచి నిర్వహిస్తున్నామన్నారు. వేద మంత్రాలు, బీజాక్షరాల సంపుటి చేసి, ఈ యాగాన్ని సామాజిక స్పృహతో నిర్వహిస్తున్నామని తెలిపారు. దేశం ధనస్సు రాశిలో ఉన్నందున గురుడు, కుజుడు, కేతువు వంటి గ్రహాల కలయిక, గురుడి శక్తిని క్షీణించేందుకు పాప గ్రహాల శక్తి పుంజుకుందని పేర్కొన్నారు. రాహువు దృష్టి గ్రహాల మీద పడటం వల్ల ఈ నెల 23 వరకు రోగాలు వృద్ధి చెందడానికి అవకాశం ఉందన్నారు.
