పుల్వామా ఘటన నేపథ్యంలో.. ప్రధాని నరేంద్ర మోదీ షూటింగ్‌లో వున్నారని వార్తలొచ్చిన నేపథ్యంలో.. పాక్ ఆక్రమిత కాశ్మీర్‌లోని పాక్ ప్రేరేపిత ఉగ్రస్థావరాలపై భారత వైమానిక దళం విరుచుకుపడిన రోజున ప్రధాని నరేంద్రమోదీ అస్సలు నిద్రపోలేదట. సోమవారం రాత్రి నుంచి మంగళవారం ఉదయం దాడి ముగిసి విమానాలు సురక్షితంగా భారత్‌లో ల్యాండ్ అయ్యే వరకు మోదీ మెలకువగానే ఉండి అనుక్షణం పర్యవేక్షించారట. ఆపరేషన్ విజయవంతం అయిందన్నవార్త తెలిసిన తర్వాతే ప్రధాని కాస్త విశ్రాంతి తీసుకున్నట్టు తెలుస్తోంది.
ఆ రోజు రాత్రి మోదీ పది నిమిషాల్లోనే డిన్నర్ పూర్తిచేసి పాక్ భూభాగంలో నిర్వహించనున్న మెరుపు దాడుల పర్యవేక్షణలో మునిగిపోయినట్టు సమాచారం. ఆపరేషన్ ముగిసిన వెంటనే పైలట్ల యోగక్షేమాల గురించి ప్రధాని నరేంద్ర మోదీ ఆరా తీశారు. అనంతరం తెల్లవారుజామున ఆపరేషన్‌లో పాల్గొన్న పైలట్లకు ప్రధాని అభినందనలు తెలిపారు.
