మాజీ మంత్రి, టీఆర్ఎస్ నేత తుమ్మల నాగేశ్వరరావు ఓటర్లపై నోరు పారేసుకున్నారు. పాలేరులో తనను ఓడించినట్టు నామా నాగేశ్వరరావును కూడా ఓడిస్తే మిమ్మల్ని కుక్కలు కూడా చూడవంటూ వ్యాఖ్యానించారు. గత అసెంబ్లీ ఎన్నికల్లో పాలేరు నుంచి పోటీ చేసిన తుమ్మల ఓడిపోయిన సంగతి తెలిసిందే. ప్రస్తుతం తుమ్మల వ్యాఖ్యలు నెట్టింట వైరల్ అవుతున్నాయి.
ఇకపోతే.. ఎన్నికలెప్పుడు జరిగినా కొన్ని నియోజకవర్గాలలో పోటీ ఆసక్తికరంగానే ఉంటుంది. అలాంటి వాటిలో చేవెళ్ళ, మల్కాజ్‌గిరి, సికిందరాబాద్‌, మెదక్, ఖమ్మం నియోజకవర్గాలు ఉన్నాయి. ఆయా చోట్ల ప్రస్తుతం కాంగ్రెస్‌-తెరాసల మద్య గట్టి పోటీ నెలకొంది.
ఖమ్మం నియోజకవర్గంలో కాంగ్రెస్‌ అభ్యర్ధి రేణుకా చౌదరి, తెరాస అభ్యర్ధి నామా నాగేశ్వరరావు ఇద్దరూ అన్ని విధాలా సమ ఉజ్జీలే కావడంతో వారిరువురిలో ఎవరు గెలుస్తారనే ఆసక్తి నెలకొని ఉంది.
నామా ఇటీవలే టిడిపి నుంచి తెరాసలో చేరి టికెట్ సంపాదించుకొన్నారు. కనుక టిడిపిలో తన అనుచరులతో పాటు తెరాస నేతలు, కార్యకర్తలు కూడా ఆయనకు తోడయ్యారు. పైగా అధికార పార్టీ అందదండలు పుష్కలంగా లభిస్తాయి.
కేసీఆర్ ఆదేశాల మేరకు తుమ్మల నాగేశ్వర రావు, పువ్వాడ అజయ్, పొంగులేటి శ్రీనివాసరెడ్డి తదితరులు నామాకు అన్ని విధాలా సహకరిస్తున్నారు. దీంతో తెలంగాణలో కేసీఆర్ సర్కారు అధికారంలో వుండటంతో ఆ పార్టీకే విజయావకాశాలుంటాయని రాజకీయ విశ్లేషకులు సెలవిస్తున్నారు.
