ఆంధ్రప్రదేశ్ రాష్ట్రంలో వైకాపా అధినేత జగన్ మోహన్ రెడ్డి గెలుస్తారని, ఆ తర్వాత ఆయన ఫెడరల్ ఫ్రంట్‌లో చేరుతారని తెరాస వర్కింగ్ ప్రెసిడెంట్ కేటీఆర్ అన్నారు. పిమ్మట ఢిల్లీలో చక్రం తిప్పుతామని ఆయన జోస్యం చెప్పారు.
తెరాస ఎన్నికల ప్రచారంలో ఆయన మాట్లాడుతూ, కేసీఆర్ ఏర్పాటు చేసే ఫెడరల్ ఫ్రంట్‌లోకి జగన్ వస్తారని, ఢిల్లీలో చక్రం తిప్పబోతున్నామని ధీమా వ్యక్తం చేశారు. జగన్, మమతా బెనర్జీ, నవీన్ పట్నాయక్, అఖిలేష్ యాదవ్‌తో కలిసి పని చేస్తామని స్పష్టం చేశారు.
ఐదేళ్లు అధికారంలో ఉన్న మోడీ చేసిన ఒకే ఒక్క పని, నోట్ల రద్దుతో సామాన్యుల నోట్లో మట్టి కొట్టడమేనని కేటీఆర్ విమర్శించారు. స్వాతంత్ర్యం వచ్చి 71 ఏళ్లు పూర్తవుతోందని కానీ కాంగ్రెస్, బీజేపీలు ప్రజలకు చేసిందేమీ లేదన్నారు. కుంభకోణాలపై ఒకదానిపై మరొకటి ఆరోపణలు చేసుకోవడం తప్ప దేశంలోని ప్రధాన సమస్యలను పట్టించుకున్నది లేదని మండిపడ్డారు.
బీజేపీ, కాంగ్రెస్ ప్రాంతీయ పార్టీల కంటే కొంచెం పెద్దవి మాత్రమేనని కేటీఆర్ ఎద్దేవా చేశారు. దక్షిణ భారతదేశంలోని ఆరు రాష్ట్రాల్లో మొత్తం లోక్‌సభ స్థానాలు 130 ఉంటే, 10 స్థానాలు కూడా గెలవలేని పార్టీలు ప్రాంతీయ పార్టీలెలా అవుతాయని ప్రశ్నించారు. అభివృద్ధి జాతీయ పార్టీలతోనే సాధ్యమనడాన్ని ఖండించిన కేటీఆర్, కాంగ్రెస్, బీజేపీ వల్ల ఏం అభివృద్ధి జరిగిందో చెప్పాలన్నారు
