సార్వత్రిక ఎన్నికల ఫలితాల తర్వాత సినీ హీరో పవన్ కళ్యాణ్ సారథ్యంలోని జనసేన పార్టీని చంద్రబాబు నాయకత్వంలోని తెలుగుదేశం పార్టీలో విలీనం చేస్తారంటూ వైకాపా మహిళా నేత వైఎస్.షర్మిల జోస్యం చెప్పారు.
ఆమె తన ఎన్నికల ప్రచారంలో భాగంగా, గుంటూరులో మాట్లాడుతూ, రాజకీయ సినిమాలో పవన్ కళ్యాణ్ ఒక యాక్టర్ అని.. చంద్రబాబు డైరెక్టర్ అని షర్మిల అన్నారు. డైరెక్టర్ చెప్పిందే ఆ యాక్టర్ చేస్తున్నారు అని విమర్శించారు. పవన్‌కు ఓటు వేస్తే, టీడీపీకి ఓటు వేసినట్లే అని చెప్పారు.
చంద్రబాబుది రోజుకో మాట.. పూటకో వేషం అని షర్మిల మండిపడ్డారు. చంద్రబాబుని చూసి ఊసరవెల్లి సైతం సిగ్గుతో పారిపోతుందన్నారు. వైసీపీకి ఏ పార్టీతోనూ పొత్తులు లేవని షర్మిళ మరోసారి స్పష్టం చేశారు. చంద్రబాబు వస్తే రాష్ట్రంలో కరువొచ్చిందన్న షర్మిల.. చంద్రబాబుని సాగనంపాలని కోరారు. బైబై బాబు.. అనేది ప్రజాతీర్పు కావాలన్నారు.
