కాంగ్రెస్ స్టార్ ప్రచారకర్త విజయశాంతి అలియాస్ రాములమ్మ తీవ్ర మనస్తాపానికి గురయ్యారు. కాంగ్రెస్ సీనియర్ నేత వి.హనుమంతరావు తీరుతో ఆమె మనస్తాపం చెందారు. ఆ తర్వాత ప్రచార రథం నుంచి దిగి వెళ్లిపోయారు.
లోక్‌సభ ఎన్నికల ప్రచారంలో భాగంగా, సిద్దిపేట జిల్లా గజ్వేల్‌లో నిర్వహించిన రోడ్‌షోలో కాంగ్రెస్ నేతలంతా పాల్గొన్నారు. అపుడు విజయశాంతిపై వీహెచ్ ఆగ్రహం వ్యక్తం చేశారు. విజయశాంతి ప్రసంగించిన తర్వాత ప్రసంగించేందుకు ప్రచారరథంపైకి వీహెచ్ వచ్చారు. ఆ తర్వాత ఆయన ప్రసంగం ప్రారభించారు.
అయితే, అప్పటికే సమయం మించిపోవడంతో పాటు మరో ప్రాంతానికి వెళ్లాల్సి ఉండటంతో ప్రసంగాన్ని త్వరగా ముగించాలంటూ వీహెచ్‌కు విజయశాంతి సైగ చేశారు. దీంతో ఆయన ఆగ్రహంతో ఊగిపోయారు. వీహెచ్ చర్యకు అలక బూనిన రాములమ్మ ప్రచారం వాహనం దిగి వెళ్లిపోయేందుకు యత్నించారు.
ఈ క్రమంలో కాంగ్రెస్ నేత నర్సారెడ్డి కలుగజేసుకొని వీహెచ్‌ను శాంతింపజేశారు. మళ్లీ తన ప్రసంగాన్ని కొనసాగించారు వీహెచ్. అయితే, దీంతో కాస్త మనసు నొచ్చుకున్న విజయశాంతి… వాహనం దిగి వెళ్లిపోయారు.
