తనకు 56 అంగుళాల ఛాతి ఉందనీ, దాన్ని అడ్డుపెట్టి శత్రుమూకల నుంచి దేశాన్ని కాపాడుతానంటూ పదేపదే వ్యాఖ్యలు చేస్తున్న ప్రధానమంత్రి నరేంద్రమోడీపై ఎన్సీపీ అధినేత, కేంద్ర మాజీ మంత్రి శరద్ పవార్ విమర్శల వర్షం గుప్పించారు. పాకిస్థాన్ జైల్లో శిక్ష అనుభవిస్తున్న మహారాష్ట్ర వ్యక్తి కుల భూషణ్ జాదవ్‌ని భారత్‌కు తిరిగి తీసుకొచ్చే విషయంలో 56 అంగుళాల నరేంద్ర మోడీ ఛాతి 12 అంగుళాలకు ముడుచుకుని పోయిందా అంటూ సూటిగా ప్రశ్నించారు.
సార్వత్రిక ఎన్నికల ప్రచారంలో భాగంగా ఆయన మాట్లాడుతూ, పాకిస్థాన్ దురాక్రమణ నుంచి భారత్‌ను కాపాడింది లాల్ బహదూర్ శాస్త్రి అని పవార్ గుర్తు చేశారు. పాకిస్థాన్‌ని రెండుగా విభజించింది ఇందిరాగాంధీ అని అన్నారు. తాను వ్యవసాయశాఖ మంత్రిగా ఉన్న సమయంలో అప్పటి ప్రధాని మన్మోహన్ సింగ్ మహారాష్ట్రలోని యవత్మాల్‌లో ఆత్మహత్య చేసుకున్న ఓ రైతు కుటుంబాన్ని పరామర్శించారని, అనంతరం ఢిల్లీ వెళ్లిన తర్వాత రూ.70 వేల కోట్ల రైతుల రుణాల మాఫీ నిర్ణయాన్ని యూపీఏ ప్రభుత్వం తీసుకుందన్నారు.
ఈ ఐదేళ్ళ కాలంలో ప్రధాని హోదాలో నరేంద్ర మోడీ ఒక్క రైతు కుటుంబాన్నైనా పరామర్శించారా అని పవార్ ప్రశ్నించారు. ఐఏఎప్ పైలట్ విక్రమ్ అభినందన్ భారత్‌కు తిరిగివచ్చిన క్రెడిట్ మోడీ తీసుకున్నాడని, అయితే జెనీవా ఒప్పందం ప్రకారం పాక్ అభినందన్‌ను విడుదల చేయాల్సి వచ్చిందని, ఇదే నిజమని పవార్ అన్నారు. మోడీ చెబుతున్నట్లుగా ఆయన వల్ల అభినందన్ భారత్‌కు తిరిగి రాలేదన్నారు.
తాను పార్లమెంట్‌లో ఓ విషయాన్ని మోడీని అడగబోతున్నానని, 56 అంగుళాల ఛాతీ ఉందని మోడీ తరచూ చెబుతుంటాడని, అయితే పాక్ జైల్లో శిక్ష అనుభవిస్తున్న మహారాష్ట్ర వ్యక్తి కుల భూషణ్ జాదవ్‌ని భారత్‌కు తిరిగి తీసుకొచ్చే విషయంలో ఆ ఛాతి 12 అంగుళాలకు ముడుచుకుని పోయిందా అని పవార్ విమర్శించారు.
