సార్వత్రిక ఎన్నికల ప్రచారం తుది దశకు చేరుకున్న వేళ ప్రధానమంత్రి నరేంద్ర మోడీ ప్రపంచంలోనే గొప్ప నటుడని కాంగ్రెస్‌ ప్రధాన కార్యదర్శి ప్రియాంక గాంధీ తీవ్ర విమర్శలు చేశారు. ఆయనకు బదులు అమితాబ్‌ బచ్చన్‌ను ప్రధానిగా ఎన్నుకొని ఉంటే బాగుండేదని వ్యంగ్యాస్త్రాలు సంధించారు.
అయితే, ఇద్దరూ ప్రజలకేమీ చేసే వారు కాదని ఎద్దేవా చేశారు. యూపీలోని మీర్జాపూర్‌లో శుక్రవారం ర్యాలీలో ప్రియాంక మాట్లా డుతూ.. రైతుల ఆదాయాన్ని రెట్టింపు చేస్తానని ప్రగల్భాలు పలికిన మోడీ దేశవ్యాప్తంగా 12 వేల మంది రైతులు ఆత్మహత్యలు చేసుకుంటే వారి కోసం కనీసం 5 నిమిషాలు కూడా కేటాయించలేదని మండిపడ్డారు. ప్రజాస్వామ్య పరిరక్షణ కోసం ప్రతి ఒక్కరూ ఓటు హక్కును వినియోగించుకోవాలన్నారు.
అభివృద్ధి అజెండా కంటే, పబ్లిసిటీ, అబద్ధాలతోనే మోడీ లబ్ది పొందాలని చూస్తున్నారని ఘాటు వ్యాఖ్యలు చేశారు. వారణాసి ప్రజలకు మోడీ ఏం చేశారో చెప్పాలని ఆమె డిమాండ్ చేశారు. నాయకుడు అనేవాడు ప్రజలకు నిజాలు చెప్పాలని, మోడీ మాత్రం అవాస్తవాలు చెబుతూ రాజకీయాలు చేస్తున్నారని విమర్శించారు.
