ఆంధ్రప్రదేశ్ కేబినేట్ ప్రమాణ స్వీకారం పూర్తయిన నేపథ్యంలో… కొత్త మంత్రులకు శాఖలు కూడా కేటాయించారు. సీనియర్లు, జూనియర్లు, మహిళలు, యువతతో జగన్ టీమ్ సమతూకంతో ఉంది. అయితే మంత్రివర్గంలో స్థానం దక్కని నేతలు కొందరు అలక పాన్పు ఎక్కినట్లు కనిపిస్తోంది. ప్రమాణ స్వీకారానికి డుమ్మా కొట్టడం ఈ అనుమానాలకు మరింత ఆజ్యం పోస్తోంది. రోజాతో పాటు మరో ఇద్దరు ముగ్గురు నేతలు కూడా ప్రమాణ స్వీకారోత్సవానికి హాజరు కానట్లు తెలుస్తోంది.
ఏపీ కేబినెట్ కూర్పులో సీఎం జగన్ ఎన్ని సంచలన నిర్ణయాలు తీసుకున్నా… ఎమ్మెల్యే రోజాకి మంత్రిపదవి ఇవ్వకపోవడంపై చాలా మంది విమర్శలు చేస్తున్నారు. సొంత వర్గం నుంచే పోటీ ఎదుర్కొని మరీ గెలిచిన ఆమెకు మంత్రి పదవి ఇవ్వకపోవడం కరెక్టు కాదని పార్టీ నేతలు కొందరు బహిరంగంగానే అభిప్రాయం వ్యక్తం చేశారు.
ఈ క్రమంలో ఆర్టీసీ ఛైర్ పర్సన్‌గా రోజాను నియమించబోతున్నారే ప్రచారం తెరపైకి వచ్చింది. మంత్రుల ప్రమాణ స్వీకారానికి రాకుండా… అలకపాన్పు ఎక్కిన రోజాతో మాట్లాడిన… పార్టీ సీనియర్ నేత, రాజ్యసభ ఎంపీ విజయసాయి రెడ్డి… ఆమెకు ఆర్టీసీ అధ్యక్షురాలి పదవి ఇవ్వబోతున్నట్లు చెప్పారనీ… దాంతో రోజా అలక వీడారనే వాదన వినిపిస్తోంది. అయితే రోజా మాత్రం జబర్దస్త్ షో జడ్జిగా ఖుషీ ఖుషీగా డ్యాన్స్ చేస్తూ ఎంట్రీ ఇచ్చింది. ప్రస్తుతం జబర్దస్త్ షోకు సంబంధించిన జూన్ ఏడో తేదీ ఎపిసోడ్ నెట్టింట వైరల్ అవుతోంది.
