సంక్రాంతికి బాక్సాఫీస్ వద్ద భారీ పోటీ నెలకొన్న సంగతి తెలిసిందే. సూపర్ స్టార్ మహేష్ బాబు `సరిలేరు నీకెవ్వరు`, స్టైలిష్ స్టార్ అల్లు అర్జున్ `అల వైకుంఠపురములో..` వంటి భారీ సినిమాలు ఇప్పటికే బెర్తులు కన్ఫామ్ చేసుకున్నాయి. సూపర్ స్టార్ రజినీకాంత్ `దర్బార్` కూడా అదే సమయానికి సిద్ధమవుతోంది. ఇన్ని భారీ సినిమాల మధ్య ఓ చిన్న సినిమా కూడా థియేటర్లలో సందడి చేయనుంది. `శతమానం భవతి` దర్శకుడు సతీష్ వేగేశ్న దర్శకత్వంలో నందమూరి కల్యాణ్ రామ్ నటిస్తున్న చిత్రం `ఎంతమంచివాడవురా`. ఈ సినిమా కూడా సంక్రాంతి బరిలోకి దిగుతోంది. కల్యాణ్ రామ్ సరసన మెహరీన్ హీరోయిన్‌గా నటిస్తోంది. శివలెంక కృష్ణ ప్రసాద్ సమర్పణలో ఉమేష్ గుప్తా, సుభాష్ గుప్తా ఈ సినిమాను నిర్మిస్తున్నారు. గోపీ సుందర్ సంగీతం అందిస్తున్నారు. తాజాగా ఈ సినిమా కొత్త పోస్టర్‌ను తన ట్విటర్ ఖాతాలో షేర్ చేసిన కల్యాణ్ రామ్ `సంక్రాంతికి థియేటర్లలో కలుస్తాన`ని ట్వీట్ చేశాడు.
