కరోనా వైరస్ ఎఫెక్ట్ తిరుమలపై కూడా పడింది. అలిపిరి చెక్ పోస్ట్‌‌ను మూసివేశారు.. వాహనాలను కొండపైకి అనుమతించడం లేదు. ఇటు అలిపిరి కాలినడక, శ్రీవారి మెట్టు మార్గంలో కూడా భక్తుల్ని అనుమతించడం లేదు. దీంతో అలిపిరి చెక్ పోస్ట్ వద్ద భారీగా వాహనాలు నిలిచిపోయాయి. తిరుమలకు వెళ్లే అన్ని దారులు మూతపడ్డాయి.. ఇటు టీడీడీ పాలకమండలి అత్యవసరంగా సమావేశంకానుంది. టీటీడీ ట్రస్ట్ బోర్డ్ సమావేశం అత్యవసరంగా ఏర్పాటు చేయడంతో.. తిరుమల ఆలయాన్ని తాత్కాలికంగా మూసివేసే అవకాశాలున్నట్లు ప్రచారం జరుగుతోంది. శ్రీవారి దర్శనాన్ని నిలిపివేయనున్నారు. ముందస్తు జాగ్రత్త చర్యల్లో భాగంగానే తాజా నిర్ణయాలు తీసుకున్నామని అధికారులు చెబుతున్నారు. గత నాలుగైదు రోజులుగా కొండపైకి భక్తుల రాక కూడా నిలిచిపోయింది.
మరోవైపు తిరుమల వెంకన్నను దర్శించుకునేందుకు వచ్చిన ఓ భక్తుడు తీవ్ర అస్వస్థతకు గురైనట్లు తెలుస్తోంది. మహారాష్ట్ర భక్తుడు వారణాసి దర్శనం తర్వాత తిరుమల చేరుకున్నాడు.. ఇక్కడికి రాగానే తీవ్ర జ్వరం, జలుబు, దగ్గుతో బాధపడుతున్నాడు. దీంతో అతడ్ని అశ్వనీ ఆస్పత్రికి తరలించారు.. అక్కడి నుంచి మెరుగైన చికిత్స నిమిత్తం తిరుపతి రుయా తరలించారు. ముందస్తు జాగ్రత్తగా భక్తుడ్ని ప్రత్యేక విభాగంలో ఉంచి వైద్యం అందిస్తున్నారు. మహారాష్ట్రలో కరోనా కేసులు నమోదు కావడంతో అధికారులు అప్రమత్తమయ్యారు.. అతడి శాంపిల్స్ సేకరించి ల్యాబ్‌కు పంపారు.
